Latur Accident : भरधाव कार थेट हॉटेलात घुसली; एकाचा मृत्यू, ६ जण गंभीर

संदीप भोसले 

लातूर : लातूर- बार्शी महामार्गावर आज दुपारच्या सुमारास भीषण अपघात झाला आहे. या अपघातात महामार्गाने भरधाव वेगाने जाणारी स्कार्पिओ कार थेट हॉटेलमध्ये घुसली आहे. या अपघातात हॉटेलमध्ये बसलेले पाच ते सहा जण गंभीर जखमी झाले आहेत. तर यात एका जणांचा जागेवरच मृत्यू झाला आहे. हा अपघात पाहणाऱ्यांच्या अंगाचा थरकाप उडाला होता. 

लातूर- बार्शी महामार्गावरील मुरुड येथे हा भीषण अपघात झाला आहे. महामार्गालगतच लहान- मोठे हॉटेल लावण्यात आलेले आहेत. यामुळे मार्गावरून येणारे जाणारे बरेच जण नास्ता किंवा चहा पिण्यासाठी थांबत असतात. अशाच प्रकारे दुपारच्या वेळी काहीजण हॉटेलमध्ये बसलेले होते. याच वेळी सुसाट वेगाने आलेली स्कॉर्पियो कार हॉटेलमध्ये घुसून खुर्च्या- टेबल आणि हॉटेलमध्ये बसलेल्यांना उडवत गेली. 

एकाचा मृत्यू, सहा जण जखमी 
लातूर बार्शी महामार्गावरच्या मुरुड येथे कारवरील नियंत्रण सुटल्याने सुसाट वेगत असणारी स्कार्पिओ थेट हॉटेलमध्ये घुसल्याची धक्कादाय घटना घडली. दरम्यान या अपघातात एकाचा जागीच मृत्यू झाला आहे. तर पाच ते सहा जण गंभीर जखमी झाले आहेत. जखमींना लातूरच्या शासकीय रुग्णालयात उपचारासाठी पाठवण्यात आले आहे.

अहिल्यानगर पुणे महामार्गावर डिझेल टँकर उलटला 
अहिल्यानगर : अहिल्यानगर- पुणे महामार्गावरील चास जवळील धोकादायक वळणावर अंदाज न आल्याने भरधाव वेगाने जाणारे डिझेलचे टँकर पलटी झाले. यामुळे टँकरमधील हजारो लिटर डिझेल रस्त्यावर सांडवले आहे. तर टँकर पलटल्यानंतर डिझेल घेण्यासाठी नागरिकांची एकच झुंबड उडाली. या अपघातामुळे नगर पुणे रोडवर दोन किलोमीटरपर्यंत वाहनांच्या रांगा लागल्या आहेत. अग्निशामक दलाने तातडीने धाव घेत डिझेल टँकरवर उडवले साबण मिश्रित पाण्याचा मारा केला.