Ladki Bahin Yojana: गरिबाचा घास लाडकीच्या घशात? गरिबांची शिवभोजन थाळी बंद होणार, आनंदाच्या शिधालाही लागणार कात्री?

विधानसभा निवडणुकीत महायुतीला यश मिळवून देणारी मुख्यमंत्री माझी लाडकी बहिण योजना आता गरिबांच्या घासावरच उठलीय. राज्य सरकारनं निधीअभावी गरिबांसाठी सुरू केलेली शिवभोजन थाळी बंद करण्याचा घाट घातल्याची माहिती सूत्रांनी दिलीय. मविआ सरकारच्या काळात शिवभोजन थाळी योजना लोकप्रिय ठरली होती. शिवभोजन थाळीत फक्त 10 रुपयांमध्ये जेवण मिळतं.

मात्र आता मुख्यमंत्र्यांनी मंत्रिमंडळ बैठकीत या योजनेचा आढावा घेण्याच्या सूचना दिल्याची सूत्रांची माहिती आहे. शिवभोजनच्या दररोज 2 लाख थाळींसाठी वार्षिक 267 कोटींचा खर्च आहे. गरिबांची दिवाळी गोड करणारी आनंदाचा शिधा योजनेवरही गंडांतर येणायची शक्यता आहे. राज्यात आणखी कोणत्या लोकप्रिय योजना आहेत ते पाहूया.

लोकप्रिय योजना, पैसा पुरेना?

मुख्यमंत्री लाडकी बहीण योजना

46,000 कोटी ₹

मुख्यमंत्री बळीराजा वीज सवलत योजना

14,761 कोटी ₹

मुलींना मोफत उच्च शिक्षण

1,800 कोटी ₹

मुख्यमंत्री युवा प्रशिक्षण

5,500 कोटी ₹

मुख्यमंत्री अन्नपूर्णा योजना

1,300 कोटी ₹

लेक लाडकी योजना

1,000 कोटी ₹

मोफत तीर्थक्षेत्र दर्शन योजना

400 कोटी ₹

मुख्यमंत्री वयोश्री योजना

480 कोटी ₹

गाव तिथे गोदाम योजना

341 कोटी ₹

दरम्यान गोरगरीबांसाठी असलेली शिवभोजन थाळी योजना सुरूच ठेवा, अशी मागणी माजी अन्न व नागरी पुरवठा मंत्री छगन भुजबळांनी एका पत्राद्वारे मुख्यमंत्र्यांकडे केलीये. तर सरकारला गोरगरीबांना अन्न देणं परवडत नाही, अशी टोला ठाकरे गटानं लगावला आहे.

आधीच लाडकीमुळे विविध विकासकामांच्या तब्बल ८९ हजार कोटींची देणी बाकी असल्याचं समोर आलंय. आता लाडकी बहीण योजना थेट गोरगरिबांच्या घासावरच उठल्याचं दिसतंय. सरकारनं तिजोरीवरचा ताण कमी करण्यासाठी गरिबांचा घास हिसकावण्यापेक्षा बोगस लाडक्यांचा शोध घ्यायला हवा.