Ladki Bahin Yojana : लाडकी झाली दोडकी? लाभ नाही सोडला तर पैसे भरावे लागणार? वाचा स्पेशल रिपोर्ट

विनोद पाटील, साम टीव्ही, प्रतिनिधी

Ladki Bahin Yojana : लाडक्या बहिणींसाठी मोठी बातमी! नियम डावलून लाभ घेणाऱ्या लाडक्या बहिणींनी लाभ न सोडल्यास सर्व पैशांची वसुली करण्यात येणार आहे. विशेष म्हणजे लाभ सोडण्यासाठी नवी व्यवस्था निर्माण केली जाणार आहे. लाडक्या बहिणींची नावं कशी वगळली जाणार? नाव न वगळल्यास कसे पैसे वसूल करणार? यावरचा हा विशेष रिपोर्ट.

नियमात बसत नसलेल्या लाडक्या बहिणींनी अर्ज मागे घ्यावेत अन्यथा दंडासहित पैसे वसुलीचे संकेत सरकारनं दिलेत. त्यामुळे लाडक्या बहिणींवर अपात्रतेची टांगती तलवार आहे. नियमाबाहेर लाभ घेतलेल्या लाडक्या बहिणींना योजनेचा लाभ सोडण्यासाठी सरकारकडून आवाहन करण्यात येणार आहे. तर लाभ सोडण्यासाठी जिल्हाधिकाऱ्यांना पोर्टल लॉगिन दिले जाणार आहे. त्यात जिल्हा पातळीवरच लाडक्या बहिणींची नावं वगळण्याची सुविधा उपलब्ध करून दिली जाणार असल्याची माहिती समोर आलीय. मात्र हा अर्ज मागे कसा घ्यावा? पाहूयात.

लाभ सोडा नाहीतर पैसे भरा.

- लाभ सोडायचा असेल तर तालुक्यातील बाल विकास प्रकल्प अधिकाऱ्याकडे लेखी अर्ज करावा.

- योजनेचा लाभ स्वतःहून सोडत असल्याचं लिहून द्यावं लागणार.

- जिल्हाधिकाऱ्यांच्या लॉगिनवरून अर्जातील नावं वगळण्याची प्रक्रिया होणार.

- स्वतःहून योजना नाकारलेले अर्ज लॉगिन वरून वगळण्याच्या जिल्हाधिकाऱ्यांना सूचना.

- पुणे आणि धुळे जिल्ह्यात यापूर्वीच 2 लाडक्या बहिणींनी अर्ज मागे घेतला आहे.

केंद्र सरकारच्या गॅस सिलिंडरवरील सबसिडी सोडण्याबाबतच्या गिव इट अप योजनेप्रमाणे लाडक्या बहिणींनाही योजनेचा लाभ सोडण्याचं आवाहन केलं जाणार आहे. एवढंच नाही तर ज्या लाडक्या बहिणी नियमाबाहेर लाभ घेत आहेत त्यांनी अर्ज मागे न घेतल्यास त्यांच्याकडून वसुली केली जाण्याची शक्यता आहे... त्यामुळे राज्यभरातील 2 कोटी 63 लाख लाडक्या बहिणींपैकी किती लाडक्या बहिणींचा पत्ता कापला जाणार? याबरोबरच आतापर्यंत 6 महिने नियमाबाहेर लाभ घेतलेल्या लाडक्या बहिणींबाबत सरकार काय निर्णय घेणार? याकडे लक्ष लागलंय..