भरत मोहळकर, साम प्रतिनिधी
अर्थसंकल्पात जाहीर करण्यात आलेली मुख्यमंत्री लाडकी बहिण योजना पहिल्या दिवसापासूनच वादात सापडलीय. त्यातच फॉर्म भरण्यासाठी घेण्यात येत असलेले पैसे, सर्व्हर डाऊन, पोर्टल बंद यासारख्या अडचणींमुळे लाडक्या बहिणीचा चांगलाच हिरमोड झाल्याचं राज्यभरातून समोर आलंय.
राज्याच्या अंतरिम अर्थसंकल्पात 21 ते 65 वर्षापर्यंतच्या महिलांसाठी मुख्यमंत्री लाडकी बहिण योजनेची घोषणा करण्यात आली. या योजनेच्या माध्यमातून महिलांना दरमहा 1500 रुपये देण्यात येणार आहेत. या योजनेची मुदत 31 ऑगस्टपर्यंत वाढवण्यात आलीय. मात्र विविध दाखल्यांसाठी आणि योजनेचा अर्ज करण्यासाठी सेतू केंद्र चालक पैशांची मागणी करत असल्याचा धक्कादायक प्रकार समोर आला. तसंच अनेक ठिकाणी सर्व्हर डाऊन, पोर्टल बंदच्याही घटना समोर आल्यात. त्यामुळे सलग तीन दिवस योजनेचा बोजवारा उडाल्याने महिलांना मनस्ताप सहन करावा लागतोय.
लाडकी बहिण योजनेसाठी अर्ज करताना किंवा दाखले काढताना पैशांची मागणी करणाऱ्यांविरोधात कठोर कारवाईचा इशारा मुख्यमंत्री एकनाथ शिंदेंनी दिलाय. राज्य सरकारच्या महत्वाकांक्षी योजनेतील गोंधळावरून विरोधकांनी सरकारला धारेवर धरलं. त्यातच सर्व्हर बंद, पोर्टल बंद याबरोबरच कागदपत्रांची जुळवा-जुळव करताना महिलांना होणाऱ्या मनस्तापामुळे सरकारने या योजनेसाठी अर्ज भरण्याची मुदत काढून टाकण्याची मागणी माजी मुख्यमंत्री पृथ्वीराज चव्हाणांनी केलीय.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.
