Kolhapur : वाहन सर्व्हिसिंग मशीनने बैल धुणं पडलं महागात; कोल्हापुरात शॉक लागून दोघांचा दुर्दैवी मृत्यू

रणजित माजगावकर, कोल्हापूर

Kolhapur Hupri Ingli 2 Farmer Death कोल्हापूरमधून धक्कादायक बातमी समोर आली आहे. हुपरी-इंगळी रस्त्यावर काल म्हणजेच बुधवार ४ मार्च रोजी संध्याकाळी विजेचा धक्का लागून दोन जणांचा दुर्दैवी मृत्यू झाला आहे. गोठ्यात बैल धुवत असताना वाहन सर्व्हिसिंग मशीनमध्ये अचानक विद्युत प्रवाह उतरल्याने ही दुर्घटना घडली. या घटनेमुळे परिसरात हळहळ व्यक्त होत आहे.

मिळालेल्या माहितीनुसार, हुपरी येथील खेमलापुरे यांच्या सुमारे शंभर जनावरांच्या गोठ्यात नेहमीप्रमाणे संध्याकाळी बैल व म्हशी धुण्याचे काम सुरू होते. यावेळी खेमलापुरे यांचे भाचे धीरज सहदेव नाईक व कामगार भगवान खंडू सोनवणे हे वाहन सर्व्हिसिंग मशीनच्या सहाय्याने जनावरे धुत होते. मात्र अचानक मशीनमध्ये विद्युत प्रवाह उतरल्याने दोघांनाही तीव्र विजेचा धक्का बसला.

धक्का इतका जबरदस्त होता की, दोघांचाही जागीच मृत्यू झाला. घटनेची माहिती मिळताच परिसरातील नागरिकांनी गोठ्याकडे धाव घेतली आणि दोघांना तत्काळ हुपरी येथील ग्रामीण रुग्णालयात दाखल केले. मात्र डॉक्टरांनी तपासून त्यांना मृत घोषित केले. या घटनेत मृत्यू झालेल्यांमध्ये भगवान खंडू सोनवणे आणि धीरज सहदेव नाईक यांचा समावेश आहे.

दरम्यान, रात्री उत्तरीय तपासणीनंतर मृतदेह नातेवाईकांच्या ताब्यात देण्यात आले असून या प्रकरणी हुपरी पोलीस ठाण्यात अकस्मात मृत्यूची नोंद करण्यात आली आहे. या घटनेने मृतांच्या कुटुंबियांवर दुःखाचा डोंगर कोसळला असून गावात हळहळ व्यक्त केली जात आहे.