Kolhapur: बायको रूसून माहेरी, नवऱ्याने व्हिडिओ कॉल करत गळ्याभोवती लावला फास; तोल गेला अन्...

कोल्हापूर जिल्ह्यातील हातकणंकले तालुक्यात एक धक्कादायक घटना घडली. माहेरी गेलेल्या पत्नीला व्हिडिओ कॉलवर "ताबडतोब घरी ये, नाहीतर फास लावून घेईन", अशी धमकी देत असताना तरूणाच्या गळ्याभोवती खरोखरच फास बसला अन् त्याचा दुर्देवी मृत्यू झाला. पत्नीच्या डोळ्यादेखत तरूणाचा जीव गेला. या प्रकरणी पोलिसांनी आकस्मीक मृत्यूची नोंद केली असून, पुढील तपास पोलीस करीत आहेत.

अभिजीत दत्तात्रेय माने (वय वर्ष ३८) असं मृत व्यक्तीचे नाव आहे. हा तरूण पुण्यात फॅब्रीकेशनची कामे करत होता. गुढीपाडव्यानिमित्त तो पुण्याहून कोल्हापुरात गेला होता. मात्र, कोल्हापुरात जायच्या आधी अभिजीतची पत्नी आपल्या दोन मुलांसह माहेरी निघून गेली होती. मानेला दारूचे व्यसन होते. यातून पती पत्नीमध्ये वारंवार भांडणे होत. याच वादाला कंटाळून तिने माहेर गाठले.

शनिवारी अभिजीतने आपल्या पत्नीला कॉल केला होता. "ताबडतोब घरी ये, नाहीतर मी आत्महत्या करेन", असं तो म्हणाला होता. धमकी देऊनही पत्नी काही बोलायला तयार नाही. त्याने नंतर पंख्याला ओढणी बांधली आणि ओढणीचा फास आपल्या गळ्याभोवती अडकवला. त्याने पुन्हा पत्नीला धमकी दिली. मात्र, धमकी देत असतानाच त्याचा तोल गेला आणि हा गळ्याभोवती बसलेला फास घट्ट झाला. पत्नीच्या डोळ्यादेखत अभिजीतचा तडफडून मृत्यू झाला.

या घटनेची माहिती मिळताच स्थानिक पोलीस घटनास्थळी दाखल झाले. पोलिसांनी पंचनामा करत मृतदेह शवविच्छेदनासाठी पाठवला. या प्रकरणी पोलिसांनी आकस्मीक मृत्यूची नोंद करण्यात आली असून, पुढील तपास पोलीस करीत आहेत. या घटनेनंतर परिसरात खळबळ उडाली आहे.