Kolhapur Accident: नववर्षांच्या पहिल्याच दिवशी काळाचा घाला, कोल्हापुरात भरधाव कारने तिघांना चिरडलं; जागेवरच मृत्यू

Summary:

• कोल्हापुरमध्ये भयंकर कार अपघात झाला

• भरधाव कारने तिघांना चिरडले

• अपघातामध्ये तिघांचा जागीच मृत्यू झाला

• रस्त्याच्या कडेला शेकोटी करत बसले असता काळाचा घाला

रणजित माजगावकर, कोल्हापूर

कोल्हापुरमध्ये नववर्षाच्या पहिल्याच दिवशी भयंकर अपघाताची घटना घडली. भरधाव कारने तिघांना चिरडले. या अपघातामध्ये तिघांचाही जागीच मृत्यू झाला. पहाटे ५ वाजताच्या सुमारास ही अपघाताची घटना घडली. अपघाताची माहिती मिळताच शाहूपुरी पोलिसांनी घटनास्थळी धाव घेत तिघांचे मृतदेह ताब्यात घेत शवविच्छेदनासाठी रुग्णालयात पाठवले. पोलिस या अपघाताचा तपास करत आहेत.

मिळालेल्या माहितीनुसार, कोल्हापुरातील पुणे- बंगळुरू राष्ट्रीय महामार्गावरील तावडे हॉटेल परिसरात हा भयंकर अपघात झाला. पहाटे ५ वाजताच्या सुमारास तिघेजण तावडे हॉटेल चौकात शेकोटी करून रस्त्याच्या कडेला उभे राहिले होते. त्याच वेळी अचानक भरधाव वेगात आलेल्या कारने या तिघांना चिरडलं. हा अपघात इतका भीषण होता की तिघांचा जागीच मृत्यू झाला.

अपघाताची माहिती मिळताच स्थानिकांनी घटनास्थळी धाव घेत पोलिसांना अपघाताची माहिती दिली. शाहूपुरी पोलिसांनी घटनास्थळी धाव घेत तिघांचे मृतदेह ताब्यात घेतले आणि शवविच्छेदनासाठी सीपीआर रुग्णालयात पाठवले. तिघांच्या मृतदेहाची ओळख पटवण्याचे काम सुरू आहे. पोलिसांनी या प्रकरणी कारचालकाविरोधात गुन्हा दाखल केला असून त्याचा शोध घेत आहेत. या अपघातामुळे तिघांचा मृत्यू झाल्याने हळहळ व्यक्त केली जात आहे.