Viral Video : तरुणींच्या नृत्यात रंगला माहोल, पण अचानक स्टेज कोसळला अन्....; धक्कादायक घटना कॅमेऱ्यात कैद

रत्नागिरी जिल्ह्यातील संगमेश्वर तालुक्यातील देवरुख गावातील शिवाजी चौकात दहीहंडी उत्सवाला गालबोट लागलं आहे. राज्यभरात दहीहंडीच्या जल्लोषाची पर्वणी असताना शनिवारी झालेल्या या कार्यक्रमात मोठ्या संख्येने नागरिक उपस्थित होते. सलग लागोपाठ तीन दिवस सुट्टी असल्याने हजारो गावकरी, परिसरातील तरुण मंडळी आणि कुटुंबियांनी या पारंपरिक जल्लोषाचा आनंद लुटला. गोविंदा पाहण्यासाठी आलेल्या नागरिकांचे मनोरंजन करण्यासाठी नृत्याचा कार्यक्रम आयोजित करण्यात आला होता. या नृत्याच्या दरम्यान स्टेज कोसळल्याची धक्कादायक घटना घडली. या घटनेचा व्हिडिओ सोशल मीडियावर व्हायरल झाला आहे.

व्हिडिओत दाखवल्याप्रमाणे दहीहंडी सोहळ्यादरम्यान नागरिकांचे मनोरंजन करण्यासाठी स्टेजवर काही नर्तिका नृत्य सादर करत होत्या. परिसरात मोठी गर्दी जमली होती आणि नागरिक उत्साहाने नृत्याचा आनंद घेत होते. मात्र अचानक स्टेज कोसळला आणि सगळ्या नर्तिका आणि स्टेजवर उपस्थित नागरिक क्षणार्धात पडले. या घटनेनंतर परिसरात एकच गोंधळ उडाला आणि लोकांमध्ये भीतीचे वातावरण पसरले. सुदैवाने या दुर्घटनेत मोठी जीवितहानी होईल अशी भीती निर्माण झाली होती, परंतु सुदैवाने कोणताही जीवितहानीचा प्रसंग घडला नाही. नर्तिका किरकोळ जखमी झाल्याचे सांगितले जात असून त्यांना तातडीने प्राथमिक उपचार देण्यात आले.

या घटनेमुळे नागरिकांमध्ये थोडा काळ भीतीचे वातावरण निर्माण झाले. अनेकांनी स्टेजच्या बांधकामाच्या सुरक्षेवर प्रश्नचिन्ह उपस्थित केले आहे. दहीहंडी सारख्या मोठ्या जनसमूह जमणाऱ्या उत्सवांमध्ये सुरक्षेची उपाययोजना व्यवस्थित असणे किती महत्त्वाचे आहे हे या घटनेतून अधोरेखित झाले आहे.

देवरुख परिसरात हा प्रकार चर्चेचा विषय ठरत असून लोक सुदैवाने कोणतीही मोठी दुर्घटना घडली नाही याबद्दल दिलासा व्यक्त करत आहेत. राज्यभरात दहीहंडीच्या जल्लोषात काही ठिकाणी गोविंदे जखमी झाल्याच्या बातम्या समोर आल्या असतानाच देवरुखच्या या घटनेने पुन्हा एकदा सुरक्षेची गरज अधोरेखित केली आहे.