Manoj Jarange Patil: मराठा आरक्षणासाठी उपोषण करणारे मनोज जरांगे कोण आहेत?

Who Is Manoj Jarange Patil

जालन्यातील लाठीमार प्रकरणानंतर मराठा आरक्षणासाठी आंदोलन करणारे मनोज जरांगे पाटील हे चांगलेच चर्चेत आले आहे. अंतरवाली सराटीमध्ये मनोज जरांगे पाटील गेल्या ७ दिवसांपासून मराठा समाजाला आरक्षण मिळावे यासाठी उपोषणाला बसले आहेत. आतापर्यंत अनेक बड्या नेत्यांनी मनोज जरांगे यांची भेट घेतली आहे. (Latest Marathi News)

मनोज जरांगे यांच्यासोबत सेल्फी घेण्याची क्रेझ

मनोज जरांगे यांचं गेल्या ७ दिवसांपासून आरक्षण मिळावे यासाठी उपोषण सुरू आहे. जालन्याच्या अंतरवाली सराटी गावात जरांगे यांचं उपोषण सुरू आहे. जरांगे यांना आतापर्यंत शरद पवार, उद्धव ठाकरे, गिरीश महाजन, राज ठाकरे यांनी मनोज जरांगे यांची भेट घेतली आहे.

अनेकांनी जरांगे यांच्या प्रकृतीची चौकशी केली आहे. याचबरोबर अतंरवाली सराटीमधील अनेक गावकरी जरांगे पाटील यांच्यासोबत सेल्फी घेण्यासाठी येत आहेत. संपूर्ण राज्यात चर्चेत असलेले जरांगे पाटील वारंवार भाषण केल्यामुळे त्यांना घसा दुखीचा त्रास होत आहे. त्यामुळे ते आराम करताना दिसत आहेत. मात्र तरीही अनेकांना त्यांच्यासोबत सेल्फी घेण्याचा मोह आवरताना येत नाहीये.

मनोज जरांगे कोण आहेत?

जालन्यात मराठा आरक्षणासाठी सुरू असलेलं आंदोलन मनोज जरांगे पाटील यांच्या नेतृत्वात होत आहे. जरांगे पाटील हे गेल्या अनेक वर्षांपासून मराठा आंदोलनाच्या चळवळीत सक्रिय आहेत. मनोज जरांगे पाटील यांचं १२ वी पर्यंत शिक्षण झालं आहे. सुरुवातीच्या काळात मनोज जरांगे पाटील यांनी हॉटेलमध्येही काम केलं.

मनोज जरांगे पाटील हे मूळचे बीड जिल्ह्याचे आहेत. ते मागील काही वर्षांपासून अंबड तालुक्यातील अंकुशनगर येथे स्थायिक आहेत. जरांगे पाटील गेल्या काही वर्षांपासून मराठा समाजाच्या प्रश्नांसाठी पूर्णवेळ काम करत आहेत.