Kartiki Ekadashi 2023: कार्तिकी सोहळ्यानिमित्त आनंदाची बातमी; प्रशासनाकडून रांगेतील भाविकांसाठी बाकांची व्यवस्था

भरत नागणे

Kartiki Ekadashi 2023:

पंढरपुरात 23 नोव्हेंबर रोजी कार्तिकीचा सोहळा साजरा होणार आहे. यंदाच्या कार्तिकी यात्रेसाठी राज्यभरातून सुमारे आठ ते दहा लाख भाविक पंढरपुरात येतील असा अंदाज आहे. त्यानुसार प्रशासनाने येणाऱ्या भाविकांना सोयी सुविधा उपलब्ध करून देण्याचा निर्णय घेतला आहे.

यंदा प्रथमच दर्शन रांगेतील भाविकांना विशेष सुविधा उपलब्ध करून देण्यात येणार आहेत. विठ्ठलाच्या पदस्पर्श दर्शनासाठी तासनतास दर्शन रांगेत उभे राहणाऱ्या भाविकांना विश्रांतीसाठी बसण्यासाठी बाकांची व्यवस्था करण्यात आली आहे. शिवाय विश्रांतीसाठी चार मंडप उभे केले जाणार आहेत. यामध्ये पंखे आणि कुलरची व्यवस्था देखील केली आहे. जवळच वैद्यकीय उपचाराची ही सोय केली आहे.

यंदा प्रथमच कार्तिकी यात्रेमध्ये दर्शन रांगेत उभे राहणाऱ्या भाविकांचा त्रास कमी करण्यासाठी टोकन देण्याचा विचार सुरू आहे. रांगेत उभे असताना भाविकाला थकवा जाणवल्यास भाविकांच्या आरामाची सुविधा दर्शन रांगेतच केली जाणार असल्याची माहिती सोलापूरचे जिल्हाधिकारी कुमार आशीर्वाद यांनी दिली. हे भाविक आराम करण्यासाठी गेल्यानंतर पुन्हा दर्शन रांगेमध्ये येण्यासाठी आता टोकन व्यवस्था करण्यात आली आहे.

कार्तिक यात्रेच्या पार्श्वभूमीवर आज जिल्हाधिकाऱ्यांनी पाहणी करून सर्व प्रशासकीय यंत्रणांची बैठक घेतली. तसेच दर्शन रांगेतील घुसखोरी थांबवण्यासाठी बॅरिगेटिंग मधील अंतर कमी करण्यात येणार आहे. यात्रेला येणाऱ्या भाविकांना स्वच्छ व निर्मळ पाण्यामध्ये स्नान करता याव यासाठी उजनी धरणातून 14 नोव्हेंबर रोजी चंद्रभागा नदीत पाणी सोडण्यात येणार आहे.