Kalyan News: धावत्या एक्स्प्रेसमध्ये धक्‍कादायक प्रकार; आई झोपलेली असताना दीड वर्षाची मुलगी अचानक झाली गायब

अभिजित देशमुख

कल्याण : धावत्या मेल एक्सप्रेसमध्ये एका दीड वर्षाच्या चिमुकलीला चोरण्याचा प्रयत्न करणाऱ्या चोरट्याला (Kalyan) प्रवाशांनी पकडून कल्याण जीआरपी पोलिसांच्या (Railway Police) ताब्यात दिले आहे. सलीम पठाण असे या चोरट्याचे नाव असून तो नाशिक येथे राहणारा आहे. (Latest Marathi News)

वसई येथील नालासोपारा परिसरात राहणारे राकेश गुप्ता हे त्यांची पत्नी आणि दीड वर्षाची मुलगी सृष्टीला घेऊन साईनगर शिर्डी एक्सप्रेसने प्रवास करीत होते. आज (९ मे) पहाटे एक्सप्रेस मुंबईच्या दिशेने येत असताना तिची आई झोपली होती. तर वडिल लघूशंकेसाठी गेले होते. हि संधी साधत सृष्टीला एका व्यक्तीने स्वत: जवळ घेतले. तो तिला घेऊन जात असताना काही सर्तक प्रवाशांची नजर त्याच्यावर पडली. काही प्रवाशांनी त्याला याबाबत हटकत विचारपूस केली. तो व्यक्ती काही उत्तर देत नव्हता.

आईला जाग आली अन्‌ झाला उलगडा

दरम्यान मुलीची झोपलेली आई जागी झाली. तिने ही माझी मुलगी असल्याचे सांगितले. तत्काळ प्रवाशांनी त्या व्यक्तिला पकडले. गाडी कल्याण स्थानकात येताच त्याला कल्याण जीआरपी पोलीसांच्या ताब्यात दिले. सलीम पठाण असे या चोरट्याचे नाव आहे. त्याच्याकडे तिकीट नव्हते. सलीम पठाणच्या विरोधात गुन्हा दाखल करण्यात आला आहे. वरिष्ठ (Police) पोलिस निरिक्षक मुकेश ढगे, पोलिस अधिकारी प्रमोद देशमुख, पोलिस अधिकारी अनिल जवले, तपास अधिकारी खेतमाली, पोलिस कर्मचारी अभिजीत जगताप यांच्या मार्गदर्शनाखाली या प्रकरणाचा तपास सुरु आहे. सलीम पठाण हा नाशिक येथील येवल्याचा राहणारा आहे.