Kalyan Crime : घरात घेऊन जात गतिमंद मुलींचा विनयभंग; कल्याणमधील संतापजनक घटना, नराधम ताब्यात

अभिजित देशमुख 
कल्याण : मुलींचा विनयभंग तसेच अत्याचाराच्या घटना सातत्याने घडत आहेत. यातच कल्याण जवळील मोहने गाळेगाव परिसरात एका १५ वर्षीय गतिमंद अल्पवयीन मुलीचा एका इसमाने विनयभंग केल्याची संतापजनक घटना समोर आली आहे. याप्रकरणी टिटवाळा पोलिसांनी गुन्हा दाखल करत विनयभंग करणाऱ्यास पोलिसांनी ताब्यात घेतले आहे. त्याला तीन दिवसांची पोलीस कोठडी सुनावण्यात आली आहे. 

कल्याण जवळील मोहने गाळेगाव परिसरात सदर गतिमंद मुलगी आपल्या कुटुंबासोबत वास्तव्यास आहे. ही मुलगी बुधवारी आपल्या घराच्या परिसरातील अंगणात खेळत होती. याच वेळी सुनील पवार या नराधमाची नजर तिच्यावर पडली. सुनील पवार याने तिला घरात बोलवुन घेतले. सदर मुलगी घरात आल्यानंतर त्याने घराचे दार बंद करत तिच्याशी अश्लील चाळे केले. 

बंद घरात आढळली मुलगी 

दरम्यान बराच वेळ झाल्यानंतर मुलगी दिसत नसल्याने तिच्या कुटुंबीयांनी आजूबाजूच्या परिसरात तिचा शोध घेण्यास सुरवात केली.  शोध घेत असताना सुनीलचे घर आतून बंद असल्याचे निदर्शनास आले. यामुळे कुटुंबियांना सुनील याच्यावर संशय आला. यामुळे त्यांनी सुनीलचा दरवाजा ठोकवला, मात्र दरवाजा बंद होता. अखेर या दरवाजाचा टाळा तोडून कुटुंबीय घरात गेले असताना घरात मुलगी आढळून आली.

गुन्हा दाखल करत आरोपी ताब्यात 

परिवाराने मुलीला बाहेर काढले. तसेच तिला विचारपूस केली असता घाबरलेल्या मुलीने घडलेला प्रकार सांगितला. या प्रकरणी कुटुंबीयांनी तत्काळ टिटवाळा पोलीस ठाण्यात तक्रार नोंदवली. या तक्रारीनुसार पोलिसांनी सुनील पवार विरोधात गुन्हा दाखल करत त्याला अटक केली आहे. तर त्याला आज कल्याण न्यायालयात हजर केले असता तीन दिवसांची पोलीस कोठडी सुनावली आहे.