Junnar Crime : शेतमालाची चोरी करण्यास विरोध; बाजार समितीत तरुणांकडून व्यापाऱ्यांवर जीवघेणा हल्ला

जुन्नर : शेतमालाची चोरी करण्यासाठी काहीजण आले होते. मात्र त्यास येथील व्यापाऱ्याने विरोध केला होता. विरोध केल्याचा राग मनात धरून नारायणगाव बाजार समितीमध्ये एका तरुणाने व्यापाऱ्यावर कोयत्याने प्राण घातक हल्ला केला. यात सदर व्यापारी जखमी झाला आहे. 

नारायणगाव बाजार समितीमध्ये हि घटना घडली असून राजगुरुनगर (ता. खेड) येथील व्यापारी गणेश एरंडे हे जबर जखमी झाले आहेत. सदरची घटना रविवारी रात्री साडेआठ वाजण्याच्या सुमारास नारायणगाव उपबाजारात घडली. (Crime News) व्यापारी गणेश एरंडे यांच्यावर खेड येथील खाजगी रुग्णालयात उपचार सुरू आहेत. तर या तरुणावर कायदेशीर कारवाई करावी. अशी मागणी जुन्नर कृषी उत्पन्न बाजार समितीचे (Bajar Samiti) सचिव रुपेश कवडे, संचालिका प्रियंका शेळके,माउली खंडागळे यांनी निवेदनाद्वारे नारायणगाव पोलिसात केली आहे.

अद्याप हल्लेखोरांना अटक नाही 

सदरच्या घटनेला तीन दिवस होऊन देखील पोलिसांकडून अद्याप आरोपीला अटक करण्यात आलेली नाही. तर बाजार समितीच्या संचालिका प्रियांका शेळके यांनी याबाबत नारायणगाव पोलिसांत निवेदन देऊन थेट पोलिस स्टेशनमधून सोशल मीडियावरून केलेल्या लाईव्हमूळे ही घटना तालुक्यात वाऱ्यासारखी परसली आहे.