Maratha Reservation: मनोज जरांगेंना अश्रू अनावर, गहिवरलेल्या आवाजात मराठा आरक्षणाबद्दल म्हणाले...

Manoj Jarange Patil Cry Video :

मराठा समाजाला आरक्षण मिळावं म्हणून उपोषणाला बसलेल्या मनोज जरांगे पाटील यांच्या उपोषणाचा आज अकरावा दिवस आहे. अकराव्या दिवशी आज त्यांची आई आणि गावातील लोक त्यांचा भेटण्यासाठी आंदोलनस्थळी आले होते. आई आणि गावकऱ्यांना पाहून जरांगे यांना अश्रू अनावर झाले.

डोळ्यात अश्रू आणि गहिवरलेल्या आवाजात मनोज जरांगे यावेळी म्हणाले की, ''आज माझ्यासाठी माझा मराठा समाज घराघरातून पेटून उठला आहे.'' ते म्हणाले, मराठा समाजातील बांधवाना सांगतो, आतापर्यंत आरक्षणासाठी जे बळी पडले, या पुढे तसं न होऊन देण्याचा मी विडा उचलला आहे. तुमच्या एकाचीही ताकद वाया जाऊ देणार नाही, असं ते भावनिक होऊन म्हणाले आहेत.

मनोज जरांगे म्हणाले की, ''आज मला कळलं की, माझं संपूर्ण गाव घराला टाळे लावून माझ्याकडे येत आहे. माझी छाती भरून गेली. संपूर्ण महाराष्ट्र माझ्या मागे उभा आहे.'' ते म्हणाले की, ''मी माझ्या सगळ्या बांधवांना सांगतो की, तुमची ताकद मी माझ्या वैयक्तिक कामासाठी न वापरता, कोट्यवधी मराठ्यांच्या मुलांचं कल्याण करून भगवा झेंडा फडकवीन तेव्हाच शांत बसेल.  (Latest Marathi News)

जरांगे यांना चर्चेसाठी राज्य सरकारने मुंबईला बोलावलं

दरम्यान, मनोज जरांगे पाटील यांना सरकारने चर्चेसाठी मुंबईला येण्यास सांगितलं आहे. संध्याकाळी साडेदहा वाजता सह्याद्री अतिगृहामध्ये बैठक होणार आहे. या बैठकीला मुख्यमंत्री, दोन उपमुख्यमंत्री, मंत्रिमंडळातील सदस्य उपस्थित राहणार आहेत.

या बैठकीला जणांची शिष्टमंडळ आज सायंकाळच्या विमानाने संभाजीनगर विमानतळावरून रवाना होणार आहे. मनोज जरांगे पाटील यांच्या मागण्यानंतर सरकारने काढलेला आदेश, त्यातील सुधारणा यावर चर्चा करून पुढील तोडगा काढण्यासाठी ही बैठक होणार आहे.