IPS अधिकाऱ्याची धडक कारवाई! वेशांतर करुन नदीत उतरला, वाळू माफियांना दणका; २ कोटींचा मुद्दमाल जप्त

अक्षय शिंदे-पाटील, साम टीव्ही, प्रतिनिधी

Jalna Crime News : जालना जिल्ह्यामध्ये प्रशिक्षणार्थी आयपीएस अधिकाऱ्याने वेशांतर करुन वाळू माफियांवर कारवाई केली आहे. त्यांनी नदी पात्रात २ जीसीबी आणि ५ हायवा ताब्यात घेतल्याची माहिती समोर आली आहे. या कारवाईमुळे वाळू माफियांचे धाबे दणाणले आहेत. ही घटना अंबड तालुक्यात घडली आहे.

मिळालेल्या माहितीनुसार, जालन्याच्या अंबड तालुक्यातील मठ पिंपळगाव येथे दुधना नदीच्या पात्रातून बेसुमार वाळू उपसा होत असल्याचे स्थानिक पोलिसांना समजले. त्यानंतर प्रशिक्षणार्थी आयपीएस अधिकारी सिद्धार्थ बारवाल यांनी वेशांतर करत थेट दुधना नदीचे पात्र गाठले. नदीच्या पात्रातून अवैध्यरित्या वाळू उपसा होत असल्याचे त्यांच्या निदर्शनास आले.

त्यानंतर सिद्धार्थ बारवाल यांनी दुधना नदीपात्रात वाळू उपसा करणाऱ्या माफियांवर कारवाई केली. सिद्धार्थ यांनी तब्बल २ कोटी ३५ लाख रुपये किंमतीचा मुद्देमाल जप्त केला. यात २ जेसीबी आणि ५ हायवा पोलिसांच्या हाती असल्याची माहिती समोर आली आहे. या घटनेमुळे प्रशिक्षणार्थी आयपीएस अधिकारी सिद्धार्थ बारवाल यांची कौतुक होत आहे.

जालन्यामध्ये मागच्या काही दिवसांपासून वाळू माफियांच्या विरोधात पोलीस प्रशासन ॲक्शन मोडवर आले आहे. या माफियांच्या विरोधात कारवाई करण्यासाठी पोलिसांनी चांगलीच कबर कसली आहे. ठिकठिकाणी छापे मारत पोलीस माफिया टोळ्यांवर कारवाई करत आहेत. पोलीस ॲक्शन मोडवर आल्याने परिसरातील माफियांचे धाबे दणाणले आहेत.