Ladki Bahin Yojana : जालना जिल्ह्यातील ४० लाडक्या बहिणींनी नाकारला लाभ; ५ लाखांहून अधिक लाभार्थी

अक्षय शिंदे 
जालना : राज्य शासनाने महिलांसाठी सुरु केलेली लाडकी बहीण योजनेला चांगला प्रतिसाद मिळाला. मात्र यासाठी पुन्हा निकष लावण्यात आल्याने अनेकांचे अर्ज बाद होत आहेत. तर काही महिला स्वतःहून योजनेचा लाभ नाकारत आहेत. त्यानुसार जालना जिल्ह्यातील ४० लाडक्या बहिणींनी आता लाडकी बहीण योजनेचा लाभ नाकारला आहे. दरम्यान प्राप्त अर्जाची छाननी सुरूच आहे. 

राज्यातील महायुती सरकारने महिलांसाठी लाडकी बहीण योजना सुरु केली. यात सुरवातीला अर्ज करणाऱ्या सर्व महिलांना पात्र ठरवत सरसकट १५०० रुपयांचा लाभ दिला जात होता. मात्र विधानसभा निवडणुकीनंतर सदरच्या योजनेसाठी निकष लावत योजनेसाठी ज्या महिलांनी अर्ज केले आहेत. त्यांची पुन्हा छाननी करून निकषात ना बसणाऱ्या महिलांचे अर्ज रद्द केले जात आहेत. यामुळे लाभार्थ्यांची संख्या कमी होत आहे. 

४० महिलांनी नाकारला लाभ 

जालना जिल्ह्यात ५ लाखांपेक्षा जास्त महिला लाडकी बहिण योजनेचा लाभ घेत आहेत. योजनेसाठी पात्र नसताना योजनेकरीता चुकून अर्ज केलेल्या जवळपास ४० महिलांनी लाडकी बहीण योजनेचा लाभ नको; म्हणून जिल्हा प्रशासनाकडे अर्ज केले होते. यानंतर जिल्हा प्रशासनाने जिल्ह्यातील ४० महिलांचा लाभ बंद केला असल्याची माहिती जालना जिल्हा महिला व बाल विकास अधिकारी कोमल कोरे यांनी दिली.

प्रशासनाकडून आवाहन 

दरम्यान, सदर योजनेसाठी अर्ज करणाऱ्या महिलांच्या अर्जाची छाननी अद्याप सुरूच आहे. यात निकषात न बसणार्यांचे अर्ज बाद केले जाणत आहे. तर पात्र नसताना ही ज्या महिलांकडून योजनेसाठी चुकून अर्ज केला गेला असेल त्यांनी जालना जिल्हाधिकारी कार्यालयात अर्ज करून मिळणारा लाभ थांबवावा असं अवाहन कोमल कोरे यांनी केले आहे.