Jalna Breaking News : जालन्यात मुसळधार पावसाचा कहर, पूल वाहून गेल्याने गावांचा संपर्क तुटला

सध्या राज्यभरात मुसळधार पावसाने धुमाकूळ घातला आहे. या मुसळधार पावसाचा फटका राज्याला बसला आहे. शेतकऱ्यांची शेती पाण्याखाली गेली, तर काहींच्या घरी पावसाचे पाणी शिरल्याच्या घटना घडल्या. अशातच आता जालना जिल्ह्यात धोधो पडणाऱ्या पावसाने मंठा तालुक्यातील देवठाणा गावाजवळील पूल वाहून गेला. पूल वाहून गेल्याने गावचा संपर्क तुटला असून नागरिकांना मोठ्या अडचणींचा सामना करावा लागत आहे.

जालना जिल्ह्यात काल सर्वदूर मुसळधार पाऊस पडला . या पावसामुळे मंठा तालुक्यातील देवठाणा गावाजवळील ओढ्याला पूर आल्याने पूल वाहून गेला आहे. मंठा तालुक्यातील कानडी येथून देवठाणामार्गे उस्वद,तळणी या गावाकडे जाणाऱ्या रस्त्यावरील पुल मुसळधार पावसाने वाहून गेल्याने कानडी गावचा संपर्क तुटला.

यामुळे नागरिकांना मोठ्या अडचणीचा सामना करावा लागत आहे. या पुलाचे काम निकृष्ट दर्जाचे झाले असल्याच्या तक्रारी यापूर्वीच ग्रामस्थांनी केल्या होत्या. वारंवार तक्रार करून सुद्धा प्रशासनाने त्याकडे लक्ष दिले नसल्याचे ग्रामस्थांचे म्हणणे आहे. आता या कामाचा दर्जा पावसामुळे उघड झाला आहे. दरम्यान आता तरी प्रशासन गावकऱ्यांचे प्रश्न सोडवणार का हे पाहणं महत्त्वाचं ठरेल.

जालन्यात आज पावसाची स्थिती काय ?

जालना जिल्ह्यात आज पावसाचा ऑरेंज अलर्ट जारी करण्यात आला असून प्रशासनाकडून नागरिकांना खबरदारी घेण्याच्या सूचना करण्यात आल्या आहेत. जिल्ह्यामध्ये सलग चौथ्या दिवशी पावसाने हजेरी लावली आहे. चार दिवसांमध्ये जिल्ह्यात ५४ मिलिमीटर पावसाची नोंद करण्यात आली. तर जिल्ह्यातील जालना बदनापूर आणि जाफराबाद तालुक्यातील अपेक्षित पावसाची सरासरी ओलांडली आहे.