कर्जातून सुटकेसाठी स्वतःच्याच मृत्यूचा बनाव, हत्या करून कारमध्ये मृतदेह पेटवला

रोहित कदम, साम टीव्ही

कर्जाच्या विळख्यातून सुटण्यासाठी एका व्यक्तीनं स्वतःच्याच मृत्यूचा असा काही बनाव केलाय ज्यानं खुद्द पोलीसही चक्रावून गेलेत. जालन्यातील जाफराबाद तालुक्यातील गोपी शिवार परिसरात स्वतःच्या मृत्यूचा खोटा बनाव रचण्यासाठी एका व्यक्तीनं दुसऱ्या व्यक्तीची हत्या केल्याचा धक्कादायक प्रकार उघडकीस आलाय. आरोपी नितीन गवळीनं एकाची हत्या करून स्वत:च्या मृत्यूचा हा सिनेस्टाईल बनाव का रचला ते पाहूयात....

आरोपी नितीन गवळीनं हा सगळा प्रकार विम्याची मोठी रक्कम मिळवण्यासाठी आणि कर्जाच्या विळख्यातून सुटका करून घेण्यासाठी स्वतःच्या मृत्यूचा बनाव रचला. या कटासाठी त्याने अमित राजू फुलारे आणि आकाश गवळी या दोघांना सोबत घेऊन संदीप चव्हाण या तरुणाचा गळा दाबून निर्घृण हत्या केली. त्यानंतर या हत्येला अपघाताचं रुप देण्यासाठी आरोपीनं संदीप चव्हाणचा मृतदेह कारमध्ये ठेवला आणि कार पेटवून दिली.

या घटनेचा छडा लावून पोलिसांनी नितीन गवळी, अमित फुलारे आणि आकाश गवळी या तिघांना बेड्या ठोकल्यात. इतकंच नव्हे तर विम्यावर दावा ठोकण्यासाठी आरोपीनं मृत्यूचा बनाव केल्याचं पोलिसांनी सांगितलंय. खरंतर, विम्याच्या पैश्यांसाठी मृत्यूचा बनाव केल्याचा हा काही पहिलाच प्रकार नाहीये. काही महिन्यांपूर्वी लातूरमध्ये 1 कोटीच्या विम्यासाठी स्वतःच्या मृत्यूचा बनाव रचण्यात आला होता. मात्र यावेळी स्वत:च्या मृत्यूच्या बनावासह निष्पाप बळीही घेतलाय. त्यामुळे अशा गुन्हेगारांना कडक शिक्षा देण्याची गरज आहे.