Jalgaon News: कानाला हेडफोन अन् डोक्यात रील बनवण्याचं खूळ; रेल्वेच्या धडकेत दोन तरुणांचा मृत्यू

सोशल मीडियावर रील स्टार होण्यासाठी अनेकजण आटापीटा करत असतात. वेगवेगळ्या प्रकारे रिल बनवून प्रसिद्ध होण्याच्या हव्यासापोटी दोन तरुणांना जीव गमावावा लागलाय. जळगावमधील पाळधी गावात दोन तरुणांना रेल्वे रुळावर बसून रील बनवणं महागात पडलं आहे. रेल्वेच्या धडकेत दोन तरुणांचा मृत्यू झालाय.

हर्षल नन्नवरे आणि प्रशांत खैरनार असे मृत तरुणांची नावे आहेत. ते दोघेही १८ वर्षाचे होते. ते पाळधी गावात रेल्वे गेट जवळील भागात राहत होते. पाळधी येथील रेल्वे गेटजवळ ते रेल्वे रुळावरून बसून रिल बनवत होते. मात्र रिल बनवण्याच्या वेडापायी त्यांचा जीव गेलाय.

पाळधी येथील रेल्वे गेटजवळ रिल बनवत असताना त्यांना अहमदाबाद एक्सप्रेसच्या धडक बसली. यात दोघांचा मृत्यू झाला. गावकऱ्यांनी दिलेल्या माहितीनुसार, हे दोघेही कानात हेडफोन लावून रुळावर बसून रिल बनवत होते. त्याच दरम्यान ही दुर्घटना घडली. पाळधी पोलीस घटनास्थळी दाखल झाल्या असून त्यांच्याकडून पंचनामा करण्याचे काम सुरू आहे.