Bribe Case : पोलीस प्रशासनात खळबळ; १५ हजारांची लाच घेताना दोन पोलिस कर्मचारी ताब्यात

पारोळा (जळगाव) : धरणगाव रस्त्यावर झालेल्या अपघात प्रकरणी संशयितास अटक न करण्यासाठी तक्रारदाराकडून तीस हजारांची लाच मागितली. तडजोड अंती ठरलेली १५ हजार रुपयांची लाच घेताना दोन पोलीस कर्मचाऱ्यांना ताब्यात घेण्यात आले आहे. या प्रकारामुळे पोलीस प्रशासनात खळबळ उडाली आहे. 

पारोळा (Parola) तालुक्यातील शेळावे येथील तक्रारदार ७ नोव्हेंबरला दुचाकीने पारोळा ते धरणगाव रस्त्यावरून जात होते. यावेळी त्यांच्या दुचाकीची समोरून येणाऱ्या दुचाकीशी धडक झाली. या अघतातात समोरील दुचाकीवरील इसम मृत झाला. याबाबत तक्रारदाराविरुद्ध पारोळा पोलिस ठाण्यात गुन्हा दाखल करण्यात आला होता. या गुन्ह्यात तक्रारदाराला अटक न करण्यासाठी पारोळ्याचे पोलिस हिरालाल देविदास पाटील (वय ४३) व प्रवीण विश्वास पाटील (वय ४५) यांनी तक्रारदाराकडे ३० हजार रुपयांच्या (Bribe Case) लाचेची मागणी केली.

दरम्यान तडजोडीअंती १५ हजार रुपयांची तक्रारदारकडे लाचेची मागणी केली. याबाबत तक्रारदाराने धुळे येथील लाचलुचपत प्रतिबंधक विभागाकडे तक्रारी दिली. त्यावरून एसीबीने सापळा रचला. एका संशयिताने तक्रारदालाला भ्रमणध्वनीवरून रक्कम घेऊन येण्यास सांगितले, तर दुसऱ्या संशयिताने रक्कम स्वीकारली असता, त्यास मुद्देमालासह पकडण्यात आले. यातील एका संशयितास पकडण्यात आले असून, दुसरा फरार आहे. ही कारवाई धुळे लाचलुचपत प्रतिबंधक विभागातील पथकाने केली.