Jalgaon : देवी विसर्जनावेळी नदीत बुडून तरुणाचा मृत्यू; आईचा एकच आक्रोश

जळगाव : नवरात्रोत्सव साजरा झाल्यानंतर देवीचे विसर्जन करण्यात आले. दरम्यान देवीची मूर्ती विसर्जन करीत असताना तोल जाऊन पाण्यात पडल्याने एका तरुणाचा बुडून मृत्यू झाल्याची घटना गिरणा नदीत घडली आहे. आई आणि बहिणीच्या डोळ्यादेखत तरुण नदीच्या प्रवाहात वाहून जात बेपत्ता झाला होता. यावेळी मुलाला वाचविण्यासाठी आईने आक्रोश केला होता. 

जळगाव शहरातील दादावाडी परिसरातील रहिवासी हितेश संतोष पाटील (वय १९) असे गिरणा नदीपात्रात बुडून मृत्यू झालेल्या तरुणाचे नाव आहे. कॉलनीत स्थापना केलेल्या देवीचे विसर्जन करण्यासाठी तरुण बांभोरी पुलाजवळ गिरणा नदी पात्रात उतरले होते. दादावाडी परिसरातील हितेश पाटील मित्रांसह दुपारी बांभोरीजवळील सुरत रेल्वे पुलानजीक गिरणा नदीपात्रात देवीची मूर्ती विसर्जनासाठी गेला होता. 

हितेशने नदीत उतरून देवीच्या मूर्तीचे विसर्जन केले. नदीच्या पाण्याचा प्रवाह जोरात होता. यावेळी मूर्ती विसर्जित केल्यानंतर हितेशला तोल गेला आणि तो नदीत पडला. पाण्याचा प्रवाह अधिक असल्याने प्रवाहासोबत तो वाहू लागला होता. यावेळी सोबतच्या मित्रांनी आरडाओरड केली. मात्र हितेशला वाचविण्यात यश मिळाले नाही. 

डोळ्यादेखत मित्र वाहून गेला 

डोळ्यासमोर हितेश बुडाल्याचे पाहून त्याच्या मित्रांनी तरुणाचा भाऊ हिमेश पाटील याला घटनेची माहिती दिली. त्यावरून कुटुंब व परिसरातील नागरिक घटनास्थळी पोहोचले. तसेच, महापालिकेच्या अग्निशमन दलाला माहिती देण्यात आली. त्या वेळी बचाव पथकासह महसूल, तालुका पोलिस ठाण्याचे कर्मचारी घटनास्थळी पोहोचले. पथकाने सायंकाळी सातपर्यंत तरुणाचा शोध घेतला. यावेळी हितेशच्या आईने एकच आक्रोश केला.