गेम खेळतांना मोबाईलचा स्फोट; बालक जखमी

जळगाव : मोबाईलवर गेम खेळत असतांना हातातील मोबाईल हँडसेटच्या बॅटरीचा अचानक स्फोट झाला. ही धक्कादायक घटना शेलवड (ता. बोदवड) येथे घडली असून यात दहा वर्षीय बालक जखमी झाला आहे. (jalgaon-news-ten-year-child-injurd-in-mobile-blast-playing-game)

चार्जिंग करत असतांना किंवा अधिक चार्जिंग झाल्यास मोबाईल हँडसेटचा स्फोट झाल्याच्या घटना घडत असतात. विशेष करून दीर्घ काळापर्यंत स्मार्टफोनचा वापर केल्याने त्याच्या बॅटरीचा स्फोट होऊन जखमी झाल्याचा घटना घडल्या आहेत. अशीच घटना शेलवड येथे घडली आहे.

जखमी बालक रुग्णालयात

सुसरी (ता. भुसावळ) येथील चेतन प्रफुल्ल पाटील (वय १०) हा बालक दिवाळीच्या सुटीनिमित्त शेलवड येथे मामाच्या घरी गेला होता. मोबाईलवर गेम खेळत असतांना हँडसेटमधील बॅटरीचा अचानक स्फोट झाला. यामुळे चेतनच्या हाताला इजा झाली. त्याला रुग्णालयात दाखल करण्यात आले असून त्याच्यावर उपचार सुरू आहेत.

मोबाइल वापरा जपून

सदर दुर्घटनेमुळे मोबाईलच्या वापरातील धोका हा पुन्हा एकदा अधोरेखीत झाला आहे. यामुळे लहान मुलांच्या हातात मोबाइल देणे टाळावा. चार्जिंगला लावलेला असतांना शक्यतो मुलांच्या हातात मोबाईल द्यायला नको.