काटेरी झुडपात बाळाचा रडण्याचा आवाज आला; शेतमजुरांनी पाहिले तर समोर आला धक्‍कादायक प्रकार

यावल (जळगाव) : सांगवी ते भालोद रस्त्यावरील एका शेताजवळ नवजात स्त्री जातीचे जीवंत अर्भक आढळून आले. या नवजात अर्भकाला सोडून अज्ञात मातेने पलायन केल्याची धक्कादायक घटना आज सकाळी उघडकीस आली असून याप्रकरणी यावल पोलीस ठाण्यात गुन्हा दाखल करण्यात आला आहे. (jalgaon-news-sangavi-bhalod-road-side-newborn-living-infant-of-the-female-species)

यावल तालुक्‍यातील सांगवी ते भालोद रस्त्यावरून शेतमजूर आज (१९ ऑक्टोबर) सकाळी शेतात जात होते. दरम्‍यान शेतात कामाला जात असतांना वाटेतील हरी बोरोले यांच्या शेताजवळ काटेरी झुडपात एका लहान बाळाचा रडण्याचा आवाज आला. यावेळी मजूरांनी पाहणी केली असता त्यांना नवजात स्त्री जातीचे अर्भक आढळून आले. या घटनेमुळे यावल परिसरात खळबळ उडाली आहे.

उपचारार्थ नेले ग्रामीण रूग्णालयात

मजूरांनी तातडीने यावल पोलीसांशी संपर्क करून घटनेची माहिती दिली. यावल पोलीस ठाण्याचे पोलीस कर्मचारी घटनास्थळी दाखल झाले. नवजात बालकाला उचलून तातडीने ग्रामीण रूग्णालयात उपचारार्थ दाखल केले आहे. याप्रकरणी शेतमजूर महिला लक्ष्मी धनराज भिल (वय २६) यांच्या फिर्यादीवरून अज्ञात महिलेविरूद्ध यावल पोलीस ठाण्यात गुन्हा दाखल करण्यात आला आहे.