Accident News : घरातून बाहेर पडताच तरुणाला बसने उडवलं, मन सुन्न करणाऱ्या घटनेनं अख्खं गाव हळहळलं

जामनेर (जळगाव) : सकाळी कामावर जाण्यासाठी निघालेल्या तरुणावर काळाने घाला घातला. कामावर जात असताना घरातून सर्वांचा निरोप घेतला. गावापासून काही अंतरावर गेल्यावर भरधाव बसने दुचाकीला धडक दिल्याने तरुणाचा जागीच मृत्यू झाल्याची घटना जामनेर तालुक्यातील गोदरी येथे घडली. 

गोदरी (ता. जामनेर) येथील निलेश तुकडसिंग नाईक (वय २७) असे अपघातात मृत तरुणाचे नाव आहे. आई, वडील, पत्नी, दीड वर्षाची मुलगी, चार भाऊ यांच्यासह गावात वास्तव्यास होता. तो जामनेरमधील (Jamner) एका खासगी हॉस्पिटल येथे शस्त्रक्रियागृह विभागात सहाय्यक म्हणून कामाला होता. दरम्यान रोजप्रमाणे रविवारी निलेश हा दुचाकीने कामावर जाण्यासाठी सकाळी साडेसातला घरातून निघाला. गाव सोडल्यावर काही अंतरावर राज्य परिवहन महामंडळाच्या सोयगाव आगाराच्या बसने जोरदार धडक (Accident) दिली. 

बसने धडक देताच निलेश हा खाली फेकला गेला. तर धडकेमध्ये त्याची दुचाकी दूरवर फरफटत गेली. निलेश खाली पडल्याने त्याचा जागीच मृत्यू झाला. दरम्यान फत्तेपुर पोलीस स्टेशनला माहिती मिळताच ग्रामस्थांच्या मदतीने जामनेर उपजिल्हा रुग्णालय येथे त्याला दाखल केले असता वैद्यकीय अधिकाऱ्यांनी तपासून मयत घोषित केले. घटनेची माहिती मिळाल्यानंतर कुटुंबीय रुग्णालयात दाखल झाले. यावेळी कुटुंबीयांनी रुग्णालयात आकोश केला होता.