Accident News: सायकलस्‍वारास बसची धडक; शेतमजूराचा मृत्‍यू

वरणगाव (जळगाव) : नवनिर्मित द्रुगती महामार्गवर तळवेल गावाजवळील आयुध निर्माणी फाट्यावर (Muktainagar) मुक्ताईनगरकडून येणाऱ्या खाजगी बसने सायकलस्‍वारास जोरदार धडक (Accident) दिली. यात सायकलस्वार मजूराचा मृत्यू झाल्याची घटना शनिवार रात्री घडली. (Varangaon) वरणगाव पोलिसात बसचालकाविरुद्ध गुन्हा दाखल करण्यात आला आहे. (Maharashtra News)

भिमनगर आयुध निर्माणी परीसरातील शेतमजूर सुकलाल शेनफडू वाघ (वय ६५) हा तळवेल येथून शेतमजूरी करून सायंकाळी सातच्या सुमारास सायकलने घराकडे जात होता. या दरम्‍यान वरणगाव आयुध निर्माणी फाट्याजवळून द्रुगती महामार्ग सायकलने ओलंडत असतांना मुक्ताईनगरकडून भरधाव वेगात येणाऱ्या खाजगी आरामदायी बसने सुकलाल वाघ यास जबर धडक दिली. अशी फिर्याद दिनेश मदन बाहरे यांनी दिली आहे.

सुकलाल वाघ यांना पोलिसांच्या व तळवेल गावातील नागरीकांच्या मदतीने गंभीर जखमी अवस्थेत वरणगाव येथील ग्रामीण रुग्णालयात आणले. मात्र वैद्यकीय अधिकारी यांनी त्याला मृत घोषीत केले. त्यांचे ग्रामिण रुग्णालयातच शवविच्छेदन करून मृतदेह नातेवाईकांच्या ताब्यात देण्यात आला. मयताच्या पश्चात पत्नी दोन मुली असा परिवार आहे.