Laxman Hake Hunger Strike: ओबीसी नेते लक्ष्मण हाकेंची प्रकृती खालावली! पाण्याचा त्याग, उपचारासही नकार; आज सरकारचे शिष्टमंडळ भेट घेणार

अक्षय शिंदे| जालना, ता. १७ जून २०२४

ओबीसी आरक्षणाला धक्का लागू नये या मागणीसाठी जालन्यातील वडीगोद्री येथे लक्ष्मण हाके आणि त्यांचे सहकारी नवनाथ वाघमारे यांचे आमरण उपोषण सुरू आहे. आज या उपोषणाचा पाचवा दिवस असून लक्ष्मण हाके यांची प्रकृती खालावली आहे. तसेच त्यांनी उपचार घेण्यासही नकार दिला आहे. याच पार्श्वभूमीवर आज राज्य सरकारचे शिष्टमंडळ त्यांची भेट घेणार आहे.

याबाबत सविस्तर माहिती अशी की, ओबीसी आरक्षणाला धक्का लागू नये या मागणीसाठी जालन्यातील वडीगोद्री येथे लक्ष्मण हाके आणि त्यांचे सहकारी नवनाथ वाघमारे यांचे आमरण उपोषण सुरू आहे. आज उपोषणाच्या सहाव्या दिवशी सरकारचे शिष्टमंडळ त्यांची भेट घेणार आहे. खासदार संदिपान भुमरे, सहकार मंत्री अतुल सावे आणि माजी केंद्रीय मंत्री डॉ.भागवत कराड हे सकाळी 9.30 वाजता उपोषणकर्त्यांशी बातचीत करणार आहे.

आज आंदोलक हाके आणि वाघमारे यांच्या उपोषणाचा पाचवा दिवस असून त्यांनी कालपासून पाणी देखील बंद केले आहे. काल त्यांची प्रकृती खालावल्याचे डॉक्टरांनी सांगितले होते. मात्र हाके यांनी कोणतेही उपचार घेण्यास नकार दिला होता. दरम्यान, सरकारचे शिष्टमंडळ लक्ष्मण हाके यांचे आमरण उपोषण सोडवण्यात यशस्वी होत का हे बघणं महत्त्वाच असणार आहे.

दरम्यान, काल ओबीसी नेते प्रकाश शेंडगे यांनीही उपोषणस्थळी भेट दिली होती. यावेळी त्यांनी सगेसोयऱ्यांचा जीआर काढणाऱ्यांचे आमदार पाडणार असा थेट इशारा राज्य सरकारला दिला होता. तसेच हे ओबीसी आंदोलन राज्यभरात सुरू होणार असल्याचेही त्यांनी म्हटले होते.