Irshalwadi News: इर्शाळवाडी दरड दुर्घटनेतील (Irshalwadi Landslide) मृतांचा आकडा २७ वर पोहचला आहे. तर ५७ जण अद्याप बेपत्ता आहेत. चौथ्या दिवशी देखील बचावकार्य युद्धपातळीवर सुरु होते. पण आता हे बचावकार्य थांबवण्याचा निर्णय पालकमंत्री उदय सामंत (Minister Uday Samant) यांनी घेतला आहे.
घटनास्थळावर सतत पडणारा मुसळधार पाऊस आणि धुक्यांमुळे शोधकार्यात अडथळे येत होते. अशामध्ये आता ढिगाऱ्याखाली दबलेले मृतदेह कुजण्यास सुरुवात झाली आहे. शोध कार्यामध्ये मृतदेहांचे अवशेष सापडत आहेत. त्यामुळे शोधकार्य थांबवण्याचा निर्णय घेण्यात आला आहे. बेपत्ता दरडग्रस्तांना मृत घोषीत केले जाणार आहे.
पालकमंत्री उदय सामंत यांनी दिलेल्या माहितीनुसार, इर्शाळवाडी येथील शोध मोहीम आजपासून थांबवण्यात आल्याचे पालकमंत्री उदय सामंत यांच्याकडून जाहीर करण्यात आले. खालापूर पोलीस ठाण्यात त्यांनी सर्व अधिकाऱ्यांची बैठक घेतली. या बैठकीनंतर त्यांनी पत्रकार परिषदेत घेत शोध मोहीम थांबण्यात आले असल्याचे जाहीर केले.
उदय सामंत यांनी दिलेल्या माहितीनुसार, '२७ मृतदेह सापडले आहेत. ५७ जण बेपत्ता आहेत त्यांना मृत घोषीत करण्यात आले. यांना मृत घोषीत करून आजपासून एनडीआरएफचे सर्च ऑपरेशन थांबवण्यात आले आहे. या दुर्घटनेमध्ये बचावलेल्या 144 लोकांचे लवकरात लवकर पुनर्वसन केले जाईल. त्यांना सिडकोमध्ये घरं देता येतील का? याबाबत मुख्यमंत्री निर्णय नक्की घेतील. दरडग्रस्तांची अवहेलना होणार नाही.'
दरम्यान, खालापूरनजीकच्या इर्शाळगडाच्या पायथ्याशी असलेल्या इर्शाळवाडीवर बुधवारी रात्री १०.३० वाजता दरड कोसळली. या दुर्घटनेत संपूर्ण इर्शाळवाडी गावच गायब झाले. या गावामध्ये ४७ घरं होती. तर २२८ जण याठिकाणी राहत होते. या दुर्घटनेमध्ये फक्त चार ते पाच घरातील लोकं बचावले. बाकी सर्वजण ढिगाऱ्याखाली अडकले गेले. ही घटना घडल्यापासून घटनास्थळावर स्थानिक प्रशासन, अग्निशमन दल आणि एनडीआरएफच्या जवानांकडून बचावकार्य सुरु होते. ते अखेर आज थांबवण्यात आले आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.