बायकोचं अश्लील चॅटींग करुन तरुणांकडून खंडणी उकळणाऱ्याला अटक

सातारा : सध्या पैसे मिळवण्यासाठी सोशल मीडियावर तरुणांना ब्लॅकमेल केल जात आहे. हनीट्रपमध्ये अडकवून खंडणीची प्रकरणे अनेक समोर आली आहे. सातारा जिल्ह्यातील वाईमध्ये अशीच एक घटना समोर आली आहे. व्हॉट्सअप (Whatsapp) वर अश्लील मेसेज करत तरुण मुलांना आपल्या जाळ्यात अडकवत खंडणी मागणाऱ्या पती-पत्नीचा वाई पोलिसांनी (Police) पर्दाफाश केला आहे. (honey trap)

साताऱ्यातील (Satara) वाई तालुक्यात हनी ट्रॅपद्वारे अनेक युवकांना आपल्या जाळ्यात ओढून एका पतीने स्वतःच्या पत्नीच्या सहाय्याने तब्बल २ लाख ८९ हजार ५०० रुपये खंडणी उकळल्याचे समोर आले आहे. याप्रकरणी आतापर्यंत बोपेगाव येथील युवकाने तक्रार दाखल केली असून कवठे आणि सटालेवाडी येथील युवकांचीही अशीच फसवणूक केल्याचे उघड झाले आहे. (Husband and wife arrested for honey trap in Satara)

संशयित महिलेने व्हॉटस् अ‍ॅपवरून (WhatsApp) अश्लील चॅटिंग करून ते कुटुंबातील लोकांना दाखवून बदनामी करू, अशी धमकी देत ब्लॅकमेलिंग केले असून दोघांनाही अटक करण्यात आली आहे. अटक करण्यात आलेल्या पूनम हेमंत मोरे (वय 30) आणि हेमंत विजय मोरे (३१, मूळ रा. ओझर्डे, ता. वाई, सध्या रा. कुडाळ, ता. जावली) अशी संशयित पती-पत्नीचे नाव आहे. या प्रकाराने वाई तालुक्यात खळबळ उडाली असून या पती-पत्नीने अजुनही अनेक युवकांना गंडा घातल्याचा संशय व्यक्त केला जात असून अशा व्यक्तींनी पोलीस स्टेशनमध्ये तक्रार दाखल करण्याचे आव्हान पोलिसांनी (Police) केले आहे.