हादरवणारी बातमी! जापानमध्ये हिंगोलीच्या २५ वर्षांच्या विद्यार्थ्याचा मृत्यू; नेमकं झालं काय?

संदीप नागरे, हिंगोली प्रतिनिधी

Hingoli Student Dies in Japan : हिंगोली येथील एका २५ वर्षांच्या तरुणाचा जपानमध्ये पोहताना दुर्दैवी मृत्यू झाल्याची धक्कादायक घटना समोर आली आहे. श्याम संतोष अग्रवाल असे या मृत विद्यार्थ्याचे नाव आहे. श्यामच्या निधनाची बातमी एका संदेशाद्वारे त्याच्या कुटुंबीयांना देण्यात आली. या घटनेमुळे अग्रवाल कुटुंबावर दुःखाचा डोंगर कोसळला असून संपूर्ण हिंगोली जिल्ह्यात हळहळ व्यक्त केली जात आहे.

श्याम याच्या मृत्यूची बातमी समजताच हिंगोलीकरांवर दुखाचा डोंगर कोसळला आहे. श्याम हा आयआयटी खरगपूर (IIT Kharagpur) येथे 'मास्टर ऑफ आर्किटेक्चर'चे शिक्षण घेत होता. 'आयआयटी एक्सचेंज' कार्यक्रमांतर्गत महाविद्यालयाकडून त्याची ६ महिन्यांच्या प्रशिक्षणासाठी निवड झाली होती. त्यानुसार तो गेल्याच महिन्यात जपानमधील हिरोशिमा विद्यापीठात पोहोचला होता.

मिळालेल्या माहितीनुसार, जपानच्या कुरे शहरातील 'कारुगा बीच पार्क' येथील स्विमिंग पूलमध्ये श्याम पोहण्यासाठी उतरला होता. मात्र, काही वेळ उलटूनही तो बाहेर आलाच नाही. थोड्या वेळाने जीवरक्षकांना त्याचा मृतदेह पाण्यावर तरंगताना आढळला.

पुढील आठवड्यात पार्थिव महाराष्ट्रात आणणार

भारत सरकारकडून श्यामचे पार्थिव (मृतदेह) मायदेशी आणण्यासाठी प्रयत्न सुरू आहेत. पुढील आठवड्याभरात त्याचे पार्थिव छत्रपती संभाजीनगर येथे आणले जाईल आणि तिथेच त्याच्यावर अंत्यसंस्कार केले जातील, अशी माहिती समोर आली आहे.