Accident News : कार आणि दुचाकी समोरासमोर धडकल्या, दुर्दैवी अपघातात पती पत्नीचा जागीच मृत्यू, मुलगी गंभीर जखमी

हिंगोलीत काल सायंकाळी सव्वा सातच्या सुमारास भीषण अपघात झाला. हा अपघात इतका दुर्दैवी होता की दुचाकीवरील दोन जण जागीच ठार झाले. तर, दोनजण गंभीर जखमी झाले आहेत. या अपघातामुळे परिसरात एकच खळबळ उडाली आहे. मृत झालेल्या दुचाकीस्वारांची नाव शेख एजाज शेख रहीम आणि त्यांची पत्नी नूरजहाँ बेगम शेख एजाज आहे. तर या अपघातात या दांपत्याची मुलगी गंभीर जखमी झाली आहे. तिच्यावर सध्या रुग्णालयात उपचार सुरु आहेत.

मिळालेल्या माहितीनुसार, वसमतकडून औंढा नागनाथच्या दिशेने येणारी कार आणि औंढा नागनाथवरून अर्धापूरकडे जात असलेली दुचाकी यांच्यात काठोडा-चोंडी परिसरात समोरासमोर जोरदार धडक झाली. या अपघाताची तीव्रता इतकी होती की दुचाकीवरील दोघे पती-पत्नी जागीच ठार झाले. तर त्यांची लहान मुलगी गंभीर जखमी झाली आहे तर कारमधील एकजण जखमी झाला आहे.

हे दोघे पती पत्नी आपल्या दुचाकीने औंढा नागनाथवरून अर्धापूरच्या दिशेने जात असताना समोरून येणाऱ्या कारने त्यांना जोरदार धडक दिली. या धडकेत दोघांचा जागीच मृत्यू झाला. त्यांची मुलगी अनाबिया बेगम शेख एजाज गंभीर जखमी झाली असून तिला तत्काळ औंढा नागनाथ येथील ग्रामीण रुग्णालयात दाखल करण्यात आले होते. मात्र, तिची प्रकृती नाजूक असल्याने तिला पुढील उपचारासाठी नांदेड येथील शासकीय रुग्णालयात पाठवण्यात आले आहे.

दरम्यान कारमधील प्रवासी देखील जखमी झाले असून त्यांना देखील पुढील उपचारासाठी रुग्णालयात दाखल करण्यात आले आहे. सदर घटनेची माहिती मिळताच औंढा नागनाथ पोलिसांनी घटनास्थळी धाव घेतली. अपघातग्रस्त वाहनांचा पंचनामा करण्यात आला असून मृतदेह औंढा नागनाथ ग्रामीण रुग्णालयात पुढील तपासणीसाठी हलविण्यात आले आहेत.

अपघाताचे नेमके कारण अद्याप समजले नसले तरी प्राथमिक माहितीनुसार, वाहनांचा वेग आणि रस्त्यावरची अंधाराची वेळ ही कारणे अपघातास कारणीभूत ठरल्याचे सांगितले जात आहे. पोलिसांनी या प्रकरणी पुढील तपास सुरू केला आहे. या भीषण अपघातात एका तरुण दाम्पत्याचा करुण अंत झाल्याने परिसरात हळहळ व्यक्त केली जात आहे.