Hingoli News: दहा मिनिटाच्या वादळाने हाहाकार; झाडे गाड्यांवर पडली, रस्ते झाले जाम

संदीप नागरे

हिंगोली : हिंगोली शहरामध्ये अचानक वादळी वारे येऊन मोठे नुकसान झाले आहे. मोठमोठी झाडे तुटून वाहनांवर (Hingoli) पडल्याने वीसपेक्षा जास्त चारचाकी वाहनांचे नुकसान झाले आहे. तर पन्नास व्यावसायिकांच्या दुकानावरील पत्रे उडाली आहेत. (Maharashtra News)

हवामान विभागाच्‍यावतीने वादळी वारा व पावसाची शक्‍यता वर्तविली होती. या अंदाजानुसार राज्‍यातील काही भागात पाऊस झाला. तर हिंगोली शहर परिसरात आज दुपारच्‍या सुमारास जोरदार वारे वाहू लागले. यामुळे हिंगोली शहरातील नांदेड नाका अग्रेसर चौक यासह जिल्हाधिकारी कार्यालय परिसरात झाडे कोसळल्याने रस्त्यावरील वाहतूक व्यवस्था खोळंबली होती.

गाड्यांचे झाले नुकसान

अनेक ठिकाणी वाहने झाडांच्या खाली दाबली गेल्याने ही वाहने बाहेर काढणे कठीण बनले होते. या वादळी वाऱ्याने वीजवितरण विभागाचे पोल, तारा देखील तुटल्याने शहरातील वीजपुरवठा खंडित झाला. आता हिंगोली पालिका व वीज वितरण कार्यालयाच्या कर्मचाऱ्यांनी कोलमडलेली व्यवस्था पूर्ववत सुरू करण्यासाठी प्रयत्न सुरू केले आहेत.