धुळ्यात लाखो रुपयांचा गुटखा जप्त !

धुळे : सोनगीर पोलीस ठाण्याच्या हद्दीमध्ये मोठ्या प्रमाणात गुटख्याची तस्करी केली जाणार असल्याची माहिती गुप्त माहितीदारामार्फत सोनगीर पोलीस ठाण्याचे वरिष्ठ अधिकारी प्रकाश पाटील यांना माहिती मिळाली होती. हा गुटखा पकडण्यासाठी पोलिसांचे एक पथक तैनात करण्यात आले होते.

हे देखील पहा -

या पथकामार्फत मुंबई-आग्रा महामार्गावर सापळा रचण्यात आला. त्यानुसार सापळ्यादरम्यान तैनात असलेल्या पोलिस कर्मचारी व अधिकाऱ्यांना माहिती मिळालेल्या क्रमांकाचा ट्रक समोरून येताना आढळल्यानंतर पोलिसांनी तात्काळ या ट्रकला थांबून त्यामध्ये बसलेल्या ट्रक चालक व वाहकाची विचारपूस केली.

परंतु त्यांच्याकडून उडवाउडवीची उत्तरे मिळत असल्याचे लक्षात आल्यानंतर पोलिसांनी तात्काळ हा ट्रक पोलीस ठाण्यात आणला व त्यानंतर या ट्रक ची संपूर्ण तपासणी करण्यात आली. या तपासणीदरम्यान आईसर ट्रक मध्ये मोठ्या प्रमाणात सुगंधी गुटखा व पानमसाला पोलिसांना आढळून आला आहे. पोलिसांनी या गुन्हयात दोघांच्या मुसक्या आवळल्या असून तब्बल 19 लाखांहून अधिकचा मुद्देमाल पोलिसांनी या कारवाईदरम्यान हस्तगत केला आहे.

Edited By : Krushnarav Sathe