BhagatSingh Koshyari : राज्यपालांकडून पुन्हा एकदा महापुरुषांचा एकेरी उल्लेख; अमोल मिटकरींनी व्हिडिओ शेअर करत मुख्यमंत्र्यांना विचारला 'तो' प्रश्न

BhagatSingh Koshyari : राज्यपाल भगतसिंह कोश्यारी आणि वाद यांच एक वेगळंच समीकरण तयार झालं आहे. गेल्या महिन्यात त्यांनी छत्रपती शिवाजी महारांविषयी वादग्रस्त उल्लेख केला होता. त्या आधी त्यांनी सावित्रीबाई फुले आणि महात्मा फुले यांच्याविषयी देखील आक्षेपार्ह वक्तव्य केले होते. त्यांनी केलेल्या वक्तव्यांनी त्यांच्यावर मोठ्याप्रमाणावर टीका करण्यात आली होती. अशात आता पुन्हा एकदा राज्यपालांनी छत्रपती शिवाजी माहाराज आणि अन्य महापुरुषांविषयी अक्षेपार्ह वक्तव्य केलं आहे. (Latest Bhagatsingh Koshyari News)

राष्ट्रवादी कॉंग्रेसचे आमदार अमोल मिटकरी यांनी राज्यपालांचा एक व्हिडिओ ट्वीटरवर शेअर केला आहे. तसेच राज्यपालांच्या मनात नेमकं काय चाललंय? याचा खुलासा मुख्यमंत्री आणि उपमुख्यमंत्री करतील का? असा सवाल केला आहे. राज्यपाल भगतसिंह कोश्यारी मुंबईमध्ये एका कार्यक्रमात उपस्थित होते. यावेळी तेथील व्यक्तींना संबोधित करताना त्यांनी महापुरुषांचा एकेरी उल्लेख केला. " आज सर्वच व्यक्ती म्हणतात की, शिवाजी असले पाहिजेत, चंद्रशेखर पाहिजेत, भगतसिंह पाहिजेत, नेताजी पाहिजेत... मात्र ते स्वत:च्या घरात नाही, तर दुसऱ्याच्या घरात असले पाहिजेत.", असे राज्यपाल भगतसिंह कोश्यारी म्हणाले.

" राज्यपाल महोदयांकडून मुंबई येथे राजभवनातील कार्यक्रमात परत एकदा छत्रपती शिवाजी महाराज व इतर महापुरुषांचा एकेरी उल्लेख ! नेमके राज्यपालांच्या मनात चाललंय तरी काय ? आता तरी मुख्यमंत्री आणि उपमुख्यमंत्र्यांनी याबाबत खुलासा करतील का? ", असा प्रश्न अमोल मिटकरींनी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांना केला आहे. यावर आता मुख्यमंत्री आणि उपमुख्यमंत्री नेमकं काय उत्तर देणार याकडे सर्वांचे लक्ष वेधले आहे.