Gondia News : परिवार झोपेत असताना घराला भीषण आग; लाखोंचे नुकसान, सुदैवाने जीवितहानी नाही

शुभम देशमुख 
गोंदिया : परिवार गाढ झोपेत असताना घराला भीषण आग लागली. क्षणार्धात आगीने (Fire) रौद्र रूप घेतले. या आगीत (Gondia) लाखो रुपयांचे नुकसान झाले आहे. मात्र सुदैवाने यात जीवितहानी टळली आहे. गोंदिया जिल्ह्यात हि घटना घडली आहे. (Latest Marathi News)

गोंदिया जिल्ह्यातील तिरोडा तालुक्यातील मेंदीपूर येथे ही घटना घडली आहे. मेंदीपूर गावात वास्तव्यास असलेले लालचंद चचाने यांच्या घरातुन रात्रीच्या सुमारास धूर निघू लागला. थोड्याच वेळात आगीने रौद्ररूप धारण केले. शेजाऱ्यांनी आग आटोक्यात आणण्याकरिता प्रयत्न केले. परंतु आग विझू शकली नाही, यानंतर अग्निशमन विभागाला (Fire Brigade) पाचारण करण्यात आले. लगेच अग्निशमन विभागाच्या दोन गाड्या गावात दाखल झाल्या व उर्वरित आग विझविली.

रोकडसह धान्यही जळाले 

मात्र, या घटनेत लालचंद चचाने यांचे घर जळून खाक झाले असून घरातील संपूर्ण सामान जळाला आहे. घरात ठेवलेले पैसे, तांदूळ अन्य धान्य, कपडे व सोफा व अन्य पूर्णच सामान जळून खाक झाला आहे. आग नेमकी कशामुळे लागली हे कळु शकले नाही.