Goa - Solapur Flight Cancel : गोवा-सोलापूर विमान अचानक रद्द; प्रवाशांमध्ये संतापाची लाट

सोलापूर विमानसेवेला प्रवाशांकडून चांगला प्रतिसाद मिळत असतानाच गोव्याहून सोलापूरकडे येणारी फ्लाइट तांत्रिक कारणामुळे अचानक रद्द करण्यात आली. यामुळे प्रवाशांमध्ये तीव्र नाराजी व्यक्त होत आहे.

गोव्यातून सोलापूरकडे येणाऱ्या या विमानात अंदाजे ५५ ते ६० प्रवासी प्रवास करत होते. विमान अचानक रद्द झाल्याने अनेक प्रवाशांचे नियोजन बिघडले.काहीजण पावसाळ्यात गोव्यात सहलीला गेले होते. ही विमानसेवा ठप्प झाल्याने प्रवाशांच्या आनंदावर विरझन पडले आहे.

विमानतळ प्राधिकरण अधिकारी अंजली शर्मा यांनी दिलेल्या माहितीनुसार, ही उड्डाण सेवा तांत्रिक कारणामुळे रद्द करण्यात आली असून, सर्व प्रवाशांना शंभर टक्के तिकीटाचे पैसे परत केले जातील असे स्पष्ट करण्यात आले.

दरम्यान, सोलापूर-गोवा ही विमानसेवा सुरू होऊन अवघा एक महिना होत असताना आतापर्यंत १३०० हून अधिक प्रवाशांनी या सेवेचा लाभ घेतला आहे. त्यामुळे अशा अचानक रद्दीमुळे विमान सेवेबाबतचा विश्वास डळमळीत होण्याची शक्यता आहे.अहमदाबाद घटनेची पुनरावृत्ती होऊ नये म्हणून प्रशासनाकडून अधिक खबरदारी घेतली जात आहे.