Konkan Travel : गणेशोत्सवाला कोकणात जाणाऱ्या नागरिकांचे हाल, रेल्वे १२ तास उशिराने, महामार्गावर वाहनांच्या लांबलचक रांगा

सर्वत्र उद्या गनारायच आगमन होणार आहे. या पार्श्वभूमीवर कोकणवासीय मुंबईहून गावाच्या दिशेने रवाना झाले आहेत. दरवर्षी हजारोंच्या संख्येने मुंबईतील नागरिक कोकणात जातात. यासाठी रेल्वेच्या विशेष गाड्या सोडल्या जातात. मात्र तिकिटांअभावी कोकणवासीयांना रस्ते मार्ग अवलंबावा लागतो. अशातच अनेक राजकीय पक्ष नागरिकांची गैरसोय होऊ नये म्हणून फ्रीमध्ये ज्यादा एसटी बस सोडतात. या बस एकत्र गावाच्या दिशेने निघाल्याने रस्ते मार्गावर वाहतूक कोंडीत नागरिकांचं कंबरडं अक्षरशः मोडत. यंदा देखील अशीच परिस्थिती उद्भवली आहे. एकीकडे कोकण रेल्वेचे वेळापत्रक कोलमडले असून रेल्वे १२ तास उशिराने धावत आहे, तर रस्ते मार्गांवर ट्रॅफिकमुळे अनेक नागरिक अडकून पडले आहेत.

गणेशोत्सव काळात कोकण रेल्वे मार्गावर तब्बल 300 हून अधिक जादा फेऱ्या चालविण्यात येत आहेत. मात्र, या वाढीव फेऱ्यांचा परिणाम नियमित रेल्वे सेवांवर झाल्याचे चित्र आहे. नियमित गाड्या साधारणपणे दोन ते तीन तास उशिराने धावत आहेत, तर काही गणपती स्पेशल गाड्यांना तब्बल दहा ते बारा तासांचा विलंब होत आहे. याचा फटका प्रवाशांना मोठ्या प्रमाणात बसला आहे.

कोइंबतूर एक्सप्रेस तब्बल 12 तास उशिराने रत्नागिरी स्थानकात दाखल झाली. तर कोकण कन्या एक्सप्रेस 3 तास 17 मिनिटे, तुतारी एक्सप्रेस 3 तास, जनशताब्दी एक्सप्रेस दीड तास, तर सावंतवाडी एक्सप्रेस तब्बल 6 तास उशिराने धावत असल्याचे दिसून आले. त्यामुळे नियोजित वेळापत्रकानुसार प्रवासाचे नियोजन करणाऱ्या चाकरमान्यांची मोठी गैरसोय झाली. दरम्यान, मुंबई आणि परिसरातून कोकणात जाणाऱ्या प्रवाशांसाठी विविध राजकीय पक्षांकडून मोफत एसटी बससेवाही उपलब्ध करून देण्यात आली आहे. मात्र, या बस मोठ्या संख्येने एकाच वेळी कोकणाच्या दिशेने रवाना झाल्याने महामार्गावरील वाहतुकीवरही मोठा ताण आला आहे.

मुंबई-गोवा महामार्गासह कोकणाकडे जाणाऱ्या प्रमुख मार्गांवर वाहनांच्या लांबच लांब रांगा लागल्या आहेत. अनेक ठिकाणी बस आणि खासगी वाहने वाहतूक कोंडीत अडकून पडली आहेत. त्यामुळे रेल्वेचा पर्याय निवडला तरी विलंब आणि रस्त्याने प्रवास केला तरी वाहतूक कोंडी, अशा दुहेरी कोंडीत गणेशभक्त सापडले आहेत. गणेशोत्सवासाठी गावाकडे निघालेल्या चाकरमान्यांचा प्रवास सुखकर होण्याऐवजी रेल्वेचा लेटमार्क आणि महामार्गावरील वाहतूक कोंडी यामुळे अक्षरशः त्रासदायक ठरत आहे. उत्सवाच्या उत्साहात घराकडे निघालेल्या नागरिकांना प्रवासातील या अडचणींमुळे मोठा मनस्ताप सहन करावा लागत आहे.