Gadchiroli Flood : वैनगंगा नदीच्या पुरामुळे शेकडो हेक्टर शेती पाण्याखाली; पुरामुळे चार राष्ट्रीय महामार्ग बंद

महेंद्र भांडेकर 
गडचिरोली : बिदर्भातील अनेक भागात मुसळधार पाऊस होत आहे. यामुळे अनेक ठिकाणी पूरजन्य परिस्थिती निर्माण झाली आहे. दरम्यान वैनगंगा नदीला देखील मोठा पूर आला असल्याने नदीच्या पुरामुळे शेकडो हेक्टर शेती पाण्याखाली गेली आहे. परिणामी शेतातील पिकांचे मोठ्या प्रमाणात नुकसान झाले आहे. तर पूरजन्य परिस्थितीमुळे चार राष्ट्रीय महामार्ग बंद झाले आहेत. 

गडचिरोलीच्या (Gadchiroli) भामरागड मधील पूरस्थिती तिसऱ्या दिवशीही जैसे थे असून हळूहळू पूर ओसरायला सुरुवात झाली आहे. मात्र दुसरीकडे गोसेखुर्द धरणातून मोठ्या प्रमाणात पाण्याचा विसर्ग सुरू असल्यामुळे वैनगंगा नदीने पात्र सोडले आहे. गोसेखुर्द धरणातून आताही 12 ते 14 हजार क्यूसेस पाण्याचा विसर्ग सुरू असल्याने गडचिरोलीतील पूरस्थिती आज दिवसभर कायम राहण्याची शक्यता आहे. नदीला आलेल्या पुरामुळे शेकडो हेक्टर शेती पाण्याखाली गेल्याने पिकांचे नुकसान झाले आहे. 

चार महामार्ग वाहतुकीस बंद 

वैनगंगा नदीला मोठा पूर असल्याने जिल्ह्यातून गेलेले चार राष्ट्रीय महामार्ग वाहतुकीसाठी बंद करण्यात आले आहेत. यात गडचिरोली- नागपूर, गडचिरोली-चामोर्शी, आल्लापल्ली-भामरागड या तीन राष्ट्रीय महामार्गसह आरमोरी - रामाळा हा प्रमुख मार्ग बंद झाला आहे.  दरम्यान मंगळवारी दुपारपासून पाऊस थांबला असल्याने नागरिकांना काहीसा दिलासा मिळाला आहे. यामुळे पूर ओसरल्यास या मार्गांवरील वाहतूक सुरु होण्याची शक्यता आहे.