Gadchiroli Heavy Rain : चौथ्या दिवशीही गडचिरोलीत पूर परिस्थिती कायम; तीन राष्ट्रीय महामार्गासह २३ प्रमुख मार्ग बंदच

मंगेश भांडेकर
गडचिरोली : गेल्या चार दिवसांपासून गडचिरोली जिल्ह्यात सुरू असलेल्या मुसळधार पावसामुळे जनजीवन विस्कळीत झाले आहे. यामुळे गडचिरोली जिल्ह्यात निर्माण झालेली पूरपरिस्थिती आजच्या चौथ्या दिवशीही कायम आहे. यामुळे जिल्ह्यातून गेलेल्या तीन राष्ट्रीय महामार्गांसह २३प्रमुख मार्ग अजूनही वाहतुकीसाठी बंदच आहेत. दरम्यान रस्त्यावर पोलीस प्रशासनांकडून बॅरिकेट्स देखील लावण्यात आले आहेत.  

विदर्भात पावसाचा हाहाकार सुरु आहे. मागील तीन दिवसांपासून सुरु असलेल्या (heavy Rain) मुसळधार पावसामुळे जिल्ह्यातील जनजीवन पूर्णतः विस्कळीत झाले आहे. पावसाची संततधार सुरु असल्याने अनेक भागात पूरजन्य परिस्थिती निर्माण झाली आहे. शेतांमध्ये देखील पाणी साचले असून शेतांना तलावाचे स्वरूप प्राप्त झाले आहे. या सर्व परिस्थितीमुळे शेतातील पिकांचे मोठ्या प्रमाणात नुकसान झाले आहे. तर (Gadchiroli) जिल्ह्यातून गेलेले महामार्ग देखील रहदारीसाठी बंद करण्यात आले आहेत. 

जिल्ह्यातून गेलेले गडचिरोली- चामोर्शी, गडचिरोली- नागपूर, आष्टी- आल्लापल्ली या प्रमुख राष्ट्रीय महामार्गासह २३ मार्ग आजही बंद आहेत. तर पुरामुळे भाजीपाला, दूध, ब्रेड अशा आवश्यक गोष्टींचा तुटवडा निर्माण झाला आहे. सलग दुसऱ्या दिवशीही शाळा, महाविद्यालयांना जिल्हाधिकाऱ्यांनी सुट्टी जाहीर केली असून गोसेखुर्द धरणाच्या पाण्यामुळे वैनगंगा नदीला पूर आला आहे. त्यामुळे वाहन धारकांचे प्रचंड हाल होत आहेत.