शेजाऱ्यांनी तरुणाची दगडाने ठेचून केली हत्या, पोलिसांना नरबळीचा संशय, जंगलात काय घडलं?

नांदेड : येथे पूर्व वैमनस्यातून एका तरूणाची हत्या घडल्याची धक्कादायक घटना घडली आहे. शेजारी राहणाऱ्या चौघांनी तरुणाची दगडाने ठेचून हत्या केल्याने एकच खळबळ उडाली आहे. ही घटना हिमायतनगर तालुक्यातील वाशी येथील जंगलात घडली आहे. पांडूरंग तोटेवार असं हत्या झालेल्या तरूणाचं नाव आहे. याप्रकरणी हिमायतनगर पोलीस (Police) ठाण्यातल हत्येचा गुन्हा दाखल करण्यात आला असून चार आरोपींना पोलिसांनी अटक केली आहे. (Four neighbors kills a man in forest)

मिळालेल्या माहितीनुसार, नांदेडमध्ये पूर्व वैमनस्यातून एका तरुणाला जीवे मारण्याच्या घटनेमुळं परिसरात भीतीचं वातावरण पसरलं आहे. शेजारच्या चार जणांनी पांडूरंग तोटेवार या व्यक्तीची दगडाने ठेचून निर्घृण हत्या केली आहे. याप्रकरणी पांडूरंगच्या भावाने पोलिसांत तक्रार दाखल केली.

त्यानंतर पोलिसांनी परमेश्वर आकलवाड, लक्ष्मण आकलवाड, रमेश आकलवाड आणि लक्ष्मीबाई आकलवाड या चार आरोपींना अटक केली आहे. पांडूरंगला हे चारही आरोपी रिक्षातून वाशी येथील जंगलात घेऊन गेले आणि त्यानंतर पांडूरंगची हत्या केली. धक्कादायक बाब म्हणजे घटनास्थळी लिंबू,फुलं,कुंकू आढळून आल्याने नरबळीचा प्रकार आहे का? याबाबत पोलीस तपास करत आहेत.

Edited By - Naresh Shende