Wardha: आई- वडील मंदिरात, चिमुकली बाहेर; अंगावर झाड कोसळलं अन् ३ वर्षीय चिमुकलीनं श्वास सोडला

अंगावर झाड कोसळल्याने चिमुकलीचा जागीच मृत्यू झाला आहे. चिमुकलीची आई मरीमाय मंदिरात नैवेद्य दाखवायला गेली होती. या दरम्यान, चिमुकली मंदिराच्या बाहेर खेळत होती. खेळत असताना तिच्या अंगावर झाड कोसळले आहे. झाड अंगावर कोसळल्यामुळे तिचा जागीच मृत्यू झाला.

घटना घडल्यानंतर चिमुकलीजवळ आई आणि वडील धावून गेले. स्थानिकांच्या मदतीने झाड बाजूला करण्यात आले. तिला खासगी रूग्णालयात नेण्यात आले. मात्र, उपचारादरम्यान तिचा मृत्यू झाला. या दुर्दैवी घटनेमुळे शहरात सर्वत्र हळहळ व्यक्त केली जात आहे.

शरद दंडारे आणि त्यांची पत्नी आणि मुलगी तिघेही पुलगाव मार्गावरील शोभा काळे यांच्या शेतातील मरीमाय माता मंदिरात गेले होते. नवरात्री नवमीनिमित्त नैवेद्य आणि दर्शनाकरिता तिघेही एकत्र गेले. आई, वडील मरीमायची पूजा करत नैवद्य चढवत होते. तर मुलगी पूर्वा दंडारे (वय वर्ष ३) ही मंदिराबाहेर बाहेर खेळत होती.

दरम्यान, जोरात सोसाट्याचा वारा सुटला. या वादळात बाहेर वाळलेले झाड कोसळले. झाडाखालीच चिमुकली देखील खेळत होती. झाड कोसळल्यामुळे ती झाडाखाली दबली गेली. घटना लक्षात येताच आई-वडिलांनी हंबरडा फोडत त्या ठिकाणी धाव घेतली. स्थानिकांच्या मदतीने झाड बाजूला करण्यात आली.

झाड बाजूला केल्यानंतर तिला तातडीने उपजिल्हा रुग्णालयात दाखल करण्यात आले. यानंतर डॉक्टरांनी तपासणी करून तिला मृत घोषित केले. या दुर्देवी घटनेची माहिती परिसरात वाऱ्यासारखी पसरली. चिमुकलीचा असा मृत्यू झाल्यामुळे परिसरातील नागरिकांनी हळहळ व्यक्त केली आहे.