Eknath Shinde : महायुतीमध्ये भूकंप? एकनाथ शिंदे वेगळा निर्णय घेण्याच्या तयारीत

Eknath Shinde vs Devendra fadnavis : मुख्यमंत्रीपदावरुन एकनाथ शिंदेंची शिवसेना आणि भाजप आमनेसामने आले आहेत. भाजपला कोणत्याही परिस्थितीमध्ये मुख्यमंत्रिपद हवे आहे. एकनाथ शिंदे मागे हटण्यास तयार नाहीत. सूत्रांच्या माहितीनुसार, एकनाथ शिंदे मोठा निर्णय घेऊ शकतात. महायुतीला एकनाथ शिंदे बाहेरून पाठिंबा देणार असल्याच्या बातम्या आल्या आहेत.

भाजपकडून एकनाथ शिंदे यांना उपमुख्यमंत्रिपद आणि केंद्रातील मंत्रि‍पदाची ऑफर देण्यात आली होती. सूत्रांनी दिलेल्या माहितीनुसार शिंदेंनी ही ऑफर नाकारत नवी ऑफऱ दिली. शिंदेंनी भाजपला बाहेरून पाठिंबा देण्याची तयारी दर्शवल्याचे समजतेय.

मुख्यमंत्रिपदावरुन महायुतीमधील दावे-प्रतिदावे समोर येत आहेत. त्यातच आज एकनाथ शिंदे यांनी तातडीची पत्रकार परिषद घेण्याचा निर्णय घेतला आहे. आज दुपारी तीन वाजता ठाण्यामध्ये एकनाथ शिंदे यांची पत्रकार परिषद होणार आहे. काळजीवाहू मुख्यमंत्री एकनाथ शिंदे काय भूमिका घेणार? याकडे राज्याचे लक्ष लागलेय.

विधानसभेला महायुतीला स्पष्ट बहुमत मिळाले. लोकांनी महायुतीला एकहाती सत्ता दिली. चार दिवस उलटले पण महायुतीकडून अद्याप मुख्यमंत्रि‍पदाचा चेहरा जाहीर करण्यात आलेला नाही. देवेंद्र फडणवीस आणि एकनाथ शिंदे यांच्यामध्ये मुख्यमंत्रीपदावरुन रस्सीखेच सुरु आहे. मुख्यमंत्रीपदासाठी देवेंद्र फडणवीस यांना महायुतीमधील १७८ आमदारांनी पाठिंबा दिला आहे. अजित पवार यांच्या राष्ट्रवादी काँग्रेसने देवेंद्र फडणवीस यांच्या पाठीशी उभं राहण्याचा निर्णय घेतलाय. देवेंद्र फडणवीस यांना राष्ट्रवादीने पाठिंबा दिल्याचे पत्र भाजपला देण्यात आलेय. त्यामुळे भाजपकडे आता स्पष्ट बहुमत झालेय.

एकनाथ शिंदे यांच्या दबावतंत्राला भाजपने खोडून काढत देवेंद्र फडणवीस यांचेच नाव पुढे केल्याचं समजतेय. राज्यात या राजकीय घडामोडी सुरु असताना एकनाथ शिंदे आज पत्रकार परिषद घेत आहे. एकनाथ शिंदे नेमकी काय भूमिका घेणार? सरकारमध्ये उपमुख्यमंत्रिपद स्वीकारणार का? महायुतीमधून बाहेर पडणार? बाहेरुन पाठिंबा देणार? की उपमुख्यमंत्री म्हणून अन्य कुणाचे नाव समोर करणार? याची चर्चा सुरु आहे.