गिरीश महाजनांनी खरेदी केली होती वतनाची जमीन, पण...; एकनाथ खडसेंचा गौप्यस्फोट

शरद पवार गटाचे नेते एकनाथ खडसे, त्यांची मुलगी शारदा यांच्याविरोधात महार वतनाची जमीन खरेदी केल्याच्या आरोपावरून पोलिसांत गुन्हा दाखल झाला आहे. पोलिसांत गुन्हा दाखल झाल्यानंतर एकनाथ खडसे यांनी स्पष्टीकरण दिलं आहे. भाजपचे मंत्री गिरीश महाजन यांनी देखील स्वत: जमीन खरेदी केली होती. मात्र आमदारकी धोक्यात येणार असल्याने तातडीने परत केल्याचा गौप्यस्फोट खडसेंनी केला आहे. ते पत्रकार परिषदेत बोलत होते. एकनाथ खडसे यांच्या आरोपाने राजकीय वर्तुळातही खळबळ उडाली आहे.

आमदार एकनाथ खडसे यांनी महार वतनाची जमीन खरेदी केल्याचा आरोपावरून जळगावातील बोदवड पोलिसांत गुन्हा दाखल करण्यात आला आहे. पोलिसांत गुन्हा दाखल झाल्यानंतर एकनाथ खडसेंनी पत्रकार परिषद घेत सत्ताधाऱ्यांवर गुन्हे दाखल केले आहेत. जिल्ह्यात एकनाथ खडसे हा एकमेव विरोधक असल्याने मला अडकवण्यासाठी कट कारस्थान केल्याचा गंभीर आरोप खडसे यांनी केला आहे. सदरची जमीन ही महार वतनाची जमीन नव्हे तर वर्ग 1 ची जमीन आहे. तिची नियमानुसार खरेदी केल्याचा खुलासा एकनाथ खडसे यांनी केला आहे .

महसूल मंत्री चंद्रशेखर बावनकुळे यांनी विधानसभेच्या सभागृहात उत्तर देताना सदरची जमीन वर्ग 1 जमीन असल्याचं स्पष्ट केलंय. खुद्द महसूल मंत्र्यांनी जमीन वर्ग एक ची असल्याचा स्पष्ट केल्यानंतरही ती महार वतनाची असल्याचं ठपका ठेवून माझ्यावर दाखल झालेला गुन्हा बोगस असून नियमबाह्य असल्याचं आरोप खडसेंनी केला आहे.

महाराष्ट्राच्या विधानसभेचा, महसूलमंत्र्यांचा एकप्रकारे अवमान झाला असून हक्कभंग दाखल करण्यासाठी प्रस्ताव देणार असल्याचं देखील एकनाथ खडसे यांनी म्हटल आहे. एकनाथ खडसे यांच्यावर गुन्हा दाखल करण्यासाठी पोलीस जेवढे तत्परता दाखवतात, तेवढी तत्परता अवैध धंदे बंद करण्यासाठी का दाखवत नाही, अशी टीका देखील खडसेंनी केली.