ED Raid: नागपुरात हिवाळी अधिवेशन तापले, बारामतीत ३ ठिकाणी ईडीची छापेमारी; रोहित पवारांच्या निकटवर्तीयांवर कारवाई

Summary -

• बारामतीमध्ये ३ ठिकाणी ईडीची छापेमारी

• जालोची वाडी, खताळ पट्टा आणि झारगडवाडी येथे पहाटेपासून ईडीची छापेमारी सुरू

• आनंद लोखंडे आणि विद्या लोखंडे यांच्या घरावर ईडीची धाड

• १० कोटींच्या डेअरी फसवणुकीचे गंभीर आरोप

बारामतीमध्ये आज सकाळपासून ईडीची छापेमारी सुरू आहे. बारामती तालुक्यातल्या जालोची वाडी, खताळ पट्टा आणि झारगडवाडी येथे आज पहाटेपासून ईडीकडून छापेमारी सुरू आहे. आनंद लोखंडे आणि विद्या लोखंडे यांच्या घरांवर ईडीची धाड पडली आहे. जालोचीवाडी या लोखंडेंच्या मूळगावात ही छापेमारी सुरू आहे. या दोघांनी पुणे आणि मुंबईतील दूध डेअरीवाल्यांना तब्बल १० कोटींचा गंडा घातला. त्याप्रकरणातच ईडीची ही कारवाई सुरू आहे.

बारामतीमध्ये गेल्या काही दिवसांपासून लोखंडे यांनी केलेल्या फसवणुकीचे प्रकरण गाजत आहे. लोखंडे दाम्पत्यांनी दूध आणि डेअरी उत्पादनात गुंवडणूक केल्यास डबल नफा मिळेल असे आमिष दाखवत अनेकांची फसवणूक केली. पुणे आणि मुंबईतील अनेक डेअरी व्यावसायिकांची या दोघांनी १० कोटी रुपयांची फसवणूक केली. मुंबई युएडब्ल्यूकडून या प्रकरणाचा तपास सुरू आहे.

विशेष म्हणजे, लोखंडे हा आमदार रोहित पवार यांचा निकटवर्तीय असल्याची चर्चा आहे. त्याने शेतकऱ्यांच्या सातबारावर पतसंस्थांचे कर्ज काढून फसवणूक केल्याच्या तक्रारी आहेत. लोखंडेने मतदारसंघात कोट्यवधींचा खर्च केल्याची माहितीही समोर येत आहे. आनंद लोखंडेंवर राजकीय ओळखींमुळे कारवाई होत नसल्याची चर्चा स्थानिक पातळीवर सुरू होती. पण आता अचानक ईडीने छापेमारी केल्यामुळे बारामतीत याची जोरदार चर्चा होत आहे.

दरम्यान, ईडीचे पथक पहाटेपासून बारामतीतील लोखंडे यांच्या मूळगावी आहे. ईडीच्या पथकाकडून घरातील कागदपत्रे, आर्थिक व्यवहाराशी संबंधित नोंदी आणि इलेक्ट्रॉनिक पुरावे जप्त केले जात आहे. या फसवणूक प्रकरणात अद्याप कुणाला अटक किंवा अधिकृत कारवाई झाली नाही. पण महत्त्वाचे धागेदोरे मिळण्याची शक्यता व्यक्त केली जात आहे. ईडीच्या या धाडीसत्रामुळे बारामतीमधील राजकीय वर्तुळात चर्चांना उधाण आले आहे.