मराठवाड्यातील अनेक जिल्ह्यांना बुधवारी पहाटेच्या सुमारास भूकंपाचे जोरदार धक्के बसले. अचानक कंपन होऊन जमीन हादरल्याने गाढ झोपेत असलेले नागरिक भयभीत झाले. घरातील भांड्यांची पडझड झाल्याने काहींनी रस्त्यावर धाव घेतली. सुदैवाने या भूकंपामध्ये कोणतीही जीवितनाही झाली नाही. मात्र, या घटनेनं संपूर्ण मराठवाड्यातील नागरिकांमध्ये घबराट पसरली आहे.
या भूकंपाचा केंद्रबिंदू हा हिंगोली जिल्ह्यातील रामेश्वर तांडा गावात असल्याचं सांगितलं जातंय. रिश्टर स्केलवकर मराठवाड्यात झालेल्या भूकंपाची सरासरी ४.५ इतकी नोंद करण्यात आली आहे. आतापर्यंत हाती आलेल्या माहितीनुसार, हिंगोली, परभणी, नांदेड, छत्रपती संभाजीनगर, जालन्यासह परिसरात भूकंपाचे धक्के जाणवले आहेत.
या भूकंपामुळे काही ठिकाणी घरांना तडे देखील गेल्याची माहिती आहे. नागरिकांनी अजिबात घाबरून जाण्याचं कारण नाही, असं आवाहन प्रशासनाच्या वतीने करण्यात आलं आहे. यापूर्वीही हिंगोली जिल्ह्यामध्ये भूकंपाचे धक्के जाणावले होते. भूगर्भातून मोठे आवाज येत असल्याच्या तक्रारी नागरिकांनी केल्या होत्या.
छत्रपती संभाजीनगर जिल्ह्यातील पैठण तालुक्यातल्या पाचोड परिसरात बुधवारी पहाटे भूकंपाचे धक्के जाणवले. यामुळे नागरिक भयभीत झाले आहेत. भूकंपांच्या धक्क्यामुळे छताचे पापुद्रे पडल्याची माहिती आहे. प्रशासनाकडून पाचोड परिसरातील भूकंपाला अद्याप दुजोरा नाही. मात्र भूकंप झाल्याचा दावा नागरिक करीत आहेत.
छत्रपती संभाजीनगर जिल्ह्यालाच लागून असलेल्या जालना जिल्ह्यातील तालुक्यांमध्ये भूकंपाचे सौम्य धक्के जाणवले. अंबड, घनसावंगी आणि परतुर तालुक्यातील काही गावांमध्ये सकाळी ७.१५ ते ७.१८ मिनिटांनी भूकंपाचे सौम्य धक्के जाणवले असल्याचे नागरिकांनी सांगितलं आहे.
हिंगोली जिल्ह्याला बुधवारी पहाटे भूकंपाचे जोरदार धक्के बसले. यामुळे नागरिकांमध्ये घबराट पसरली. रिश्टर स्केलवर या भूकंपाची नोंद ४.२ इतकी करण्यात आली आहे. नागरिकांनी घाबरून जाऊन असं आवाहन प्रशासनाकडून करण्यात आलं आहे. भूकंपाचा केंद्रबिंदू रामेश्वर तांडा गावात असल्याचं बोललं जातंय.
दुसरीकडे नांदेड जिल्ह्यालाही बुधवारी सकाळी ७ वाजून १४ मिनिटांनी भूकंपाचा धक्का जाणवला. अचानक जमीन हादरू लागल्यामुळे अनेक नागरिक घाबरुन घराबाहेर आले. सुदैवान यात कोणतीही जीवितहानी झाली नाही. मात्र, भूकंपाचे धक्के बसल्याने संपूर्ण नांदेड जिल्ह्यातील नागरिकांमध्ये भीतीचे वातावरण निर्माण झाले.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.