Dipali Sayyad News: दिपाली सय्यद यांचे दाऊद गॅंगशी संबंध; माजी स्वीय सहाय्यक भाऊसाहेब शिंदेचा गंभीर आरोप

>> सचिन बनसोडे

अहमदनगर : शिवसेनेच्या शिंदे गटाच्या नेत्या दिपाली सय्यद भोसले यांच्यावर त्यांचे माजी स्वीय सहाय्यक भाऊसाहेब शिंदे यांनी पुन्हा एकदा गंभीर आरोप केला आहे. अंडरवर्ल्ड डॉन दाऊद इब्राहिम याचा भाऊ इकबाल कासकर आणि सलीम फ्रूटवाला यांच्यासोबत आर्थिक संबंध असून त्या अनेक वेळा दुबईला जातात. त्यांची चौकशी केली तर त्यांचे पाकिस्तान कनेक्शन उघड होईल असा गंभीर आरोप भाऊसाहेब शिंदे यांनी केला.

अहमदनगरमध्ये त्यांनी पत्रकार परिषद घेतली होती. सर्व पुरावे माझ्याकडे असून मला संरक्षण द्या मी राज्य शासन आणि पोलिसांना पुरावे देऊ शकतो, असा दावाही शिंदे यांनी केला आहे. (Political News)

राज्यपाल भगतसिंग कोश्यारी यांच्या उपस्थितीत कोविड योद्धा पुरस्कार प्रदान केले. हा कार्यक्रम दिपाली सय्यद यांच्या फाउंडेशनच्या माध्यमातून घेण्यात आला होता. त्यावेळी सर्व कोविड योध्यांना 50 हजार रुपयांचे चेक देण्यात आले होते.

मात्र हे चेक खोटे असून 50 लोकांना दिलेल्या चेक पैकी एकही चेक बँकेत जाऊन पैसे काढण्या लायक नसल्याने दिपाली सय्यद आणि राज्यपालांनी कोविड योध्यांची फसवणूक केली आहे, असंही शिंदे यांनी म्हटलं.

तसेच सांगलीमध्ये कोविड काळात सामूहिक विवाहाचे आयोजन केले होते. त्या ठिकाणी नाव नोंदणी न झाल्याने लग्न झालेले आणि ज्यांना मुले आहेत, अशा दाम्पत्याची लग्न लावली गेली आहेत. या कार्यक्रमालाही राज्यपालांनी उपस्थिती लावली होती.

माझ्या संरक्षणाची जबाबदारी राज्य शासनाने घ्यावी. मी 30 जानेवारी रोजी नगरमध्ये पुन्हा पत्रकार परिषदेत अंडरवर्ल्ड डॉन दाऊद इब्राहिम, इकबाल कासकर आणि सलीम फ्रूटवाला यांच्याबरोबर दिपाली सय्यद यांचे आर्थिक व्यवहार असल्याचे पुरावे देऊ, असा दावा भाऊसाहेब शिंदे यांनी केलाय.