Shirpur Accident : भरधाव डंपरची रिक्षाला धडक; दोन महिलांचा मृत्यू, सहा जखमी

शिरपूर (धुळे) : प्रवाशी घेऊन जाणाऱ्या रिक्षाला भरधाव डंपरने जोरदार धडक दिली. यामुळे झालेल्या भीषण अपघातात दोन महिलांचा मृत्यू झाला. तर सहा प्रवासी जखमी झाले. अपघातातील जखमींपैकी काहींची प्रकृती गंभीर असून, त्यांना धुळे येथे रवाना करण्यात आले.

मुंबई-आग्रा राष्ट्रीय महामार्गावर (Mumbai Agra Highway) ताजपुरी (ता. शिरपूर) फाट्याजवळ हा अपघात घडला. शिरपूर तालुक्यातील गिधाडे येथून प्रवासी घेऊन रिक्षा शिरपूरकडे मार्गस्थ झाली. ताजपुरी फाट्याकडून महामार्गावर येत असलेल्या डंपरने रिक्षाला जोराची धडक दिली. त्यामुळे रिक्षा पुढे फेकली गेली. रिक्षाला धडक (Accident) बसल्याने प्रवाशी घाबरले होते. अपघात पाहून महामार्गावरून जाणाऱ्यांनी थांबत मदतकार्य सुरू केले. जखमींना उपजिल्हा रुग्णालयात दाखल करून उपचारांना सुरुवात झाली.

दरम्यान या अपघातात दगूबाई राजू ठाकरे (वय ५३, रा. मरीमातानगर, अमळनेर) व कमलबाई मगन मराठे (५८, रा. क्रांतीनगर, शिरपूर) यांचा मृत्यू झाला. अन्य सहा प्रवाशी जखमी झाले आहेत. त्यातील चौघांना धुळ्याला हलविण्यात आले आहे. घटनेनंतर पोलीस दाखल झाले होते. या अपघात प्रकरणी गुन्हा नोंदविण्यात आला आहे.