एकाच कारचे दोन नंबर..म्‍हणून पोलिसांना आला संशय

धुळे : पेट्रोलिंग करत असताना पोलिसांना एकाच कारचे दोन नंबर असल्‍याचे लक्षात आले. यानंतर पिंपळनेर पोलिसांनी केलेल्या कारवाईत विविध कंपन्यांच्या दारूसाठ्यासह ११ लाख ३६ हजाराहून अधिकचा मुद्देमाल पोलिसांनी हस्तगत केला. (dhule-news-two-numbers-of-the-same-car-police-got-suspicion-and-Alcohol-confiscated)

साक्री (Sakri) तालुक्यातील पिंपळनेर पोलीस (Police) कुडाशी ते वारसा या परिसरामध्ये पेट्रोलिंग करत असताना एका कारकडे अचानक अधिकाऱ्यांचे लक्ष गेले. या कारचा पुढील बाजूचा नंबर तसेच मागील बाजूला असलेला नंबर हे दोन्ही वेगवेगळे असल्याचे निदर्शनास आल्यानंतर पोलीस अधिकाऱ्यांनी या वाहनाजवळ जाऊन चौकशी केली. परंतु वाहनामध्ये असलेला वाहन चालक पोलीस येत असल्याचे बघून गाडी सोडून पसार झाला. या चालकाचा पोलिसांनी पाठलाग केला. परंतु हा वाहन चालक पळून जाण्यामध्ये यशस्वी झाला.

११ लाखाचा माल हस्‍तगत

पोलिसांनी वाहनाची तपासणी केली असता, त्यामध्ये मोठ्या प्रमाणात अवैधपणे वाहून आणलेला मद्याचा साठा आढळून आला आहे. या कारवाई दरम्यान पोलिसांनी जवळपास ११ लाख ३६ हजाराहून अधिकचा मुद्देमाल पिंपळनेर पोलिसांनी जप्त केला आहे. त्यामध्ये मोठ्या प्रमाणात विविध कंपन्यांची दारू पोलिसांनी हस्तगत केली आहे.