Dhule Weather: धुळ्यात उन्हाचा चटका वाढला; तापमान पोहचले ४३ अंशाच्यावर

धुळे : राज्यात मागील तीन- चार दिवसांपासून उष्णतेची लाट पसरलेली आहे. यात खानदेशात तापमानाने उच्चांक गाठला आहे. धुळे शहरात देखील तापमान वाढण्यास सुरवात झाली असून धुळ्यात आज उच्चांकी ४३. अंश सेल्सिअस इतक्या तापमानाची नोंद झाली आहे.

यंदा अधिक तापमान (Temperature) राहण्याची शक्यता हवामान विभागाने वर्तविली आहे. त्यानुसार आता तापमान आता वाढत असून सूर्य आग ओकत असल्याचा अनुभव येत आहे. दरम्यान धुळे (Dhule) शहरासह जिल्हाभरामध्ये उष्णतेची लाट अद्याप कायमच आहे. आज देखील धुळ्यामध्ये ४३. अंश सेल्सिअस इतक्या तापमानाची नोंद करण्यात आली आहे, जवळपास महिनाभरापासून धुळ्यामध्ये तापमानाचा पारा हा ४० अंशाच्या पार असून गेल्या काही दिवसांपासून हा तापमानाचा पारा आणखीनच वाढल्याचे बघायला मिळाले आहे. 

तापमानात आणखी वाढ होण्याची शक्यता 
पुढील काही दिवस अशाच प्रकारे उष्णतेची लाट (Heat Wave) धुळ्यात कायम राहणार असल्याचा अंदाज हवामान विभागातर्फे वर्तविण्यात आला आहे. तापमान ४५ अंशापर्यंत जाण्याची शक्यता असल्याने कामाशिवाय बाहेर निघण्याचे टाळावे. तसेच उन्हापासून बचाव करण्याचे आवाहन करण्यात आले आहे.