तीन वाहनांचा विचित्र अपघात; अपघातात तिघांचा जागीच मृत्यू

धुळे : धुळे शहरापासून काही किलोमीटर दूर अंतरावर असलेल्या पुरमेपाडा याठिकाणी मुंबई-आग्रा महामार्गावर तीन वाहनांमध्ये विचित्र अपघात (Accident) झाला आहे. यात तीन जणांचा जागीच मृत्यु झाला. (Dhule news mumbai agra highway accident three death)

मुंबई-आग्रा महामार्गावर ट्रक, ॲपेरिक्षा आणि क्रुझर या तीन वाहनांमध्ये रात्री साडेबारा वाजेच्या दरम्यान अपघात झाला. या भीषण अपघातात तीन जणांचा जागीच मृत्यू झाला असून, सहा जण गंभीर जखमी झाले आहेत. मृतांपैकी ॲपेरिक्षा चालक बराच वेळ ट्रकखाली तसाच अडकून होता. रात्री उशिरापर्यंत अडकलेल्या ॲपेरिक्षा चालकाला क्रेनच्या सहाय्याने काढण्याचा पोलीस प्रशासनातर्फे प्रयत्न करण्यात आले. तर जखमींना जिल्हा शासकीय रुग्णालयात उपचारासाठी दाखल करण्यात आले आहे.

काहींची प्रकृती चिंताजनक

जखमीमधील काहींची प्रकृती चिंताजनक असल्याने मृतांचा आकडा वाढण्याची भीती व्यक्त करण्यात येत आहे. घटनेची माहिती मिळताच धुळे तालुका पोलिस तात्काळ घटनास्थळी दाखल होत पोलीस प्रशासनातर्फे बचावकार्य रात्री उशिरापर्यंत करण्यात आले आहे.