Dhule News: खाकीचा गैरवापर करणाऱ्याला बडतर्फ करा; सकल धनगर समाज आक्रमक

धुळे : खाकीचा गैरवापर करणाऱ्या पोलिस अधिकाऱ्यास कायमस्वरूपी बडतर्फ करा; या मागणीसाठी सकल धनगर समाज आक्रमक झाल्याचे बघावयास मिळाला आहे. धुळे (Dhule) जिल्हाधिकारी कार्यालय परिसरात असलेल्या क्यूमाईन क्लब समोर धरणे आंदोलन करण्यात आले. (Maharashtra News)

जालना (Jalna) जिल्ह्यातील परतूर तालुक्यातील कोकाटे हादगाव येथील धनगर बांधवाच्या घरावर गावातील काही लोकांनी सामुहिक हल्ला करुन दगडफेक केल्याची घटना समोर आली होती. याबाबतची तक्रार देण्यासाठी गेलेल्या अन्यायग्रस्त लोकांची तक्रार दाखल करुन न घेता उलट त्यांनाच पोलिस (Police) कोठडीत मारहाण केली. तसेच खोटे गुन्हे दाखल केल्याचा आरोप करीत सदरील पीडित नागरिकांना दिवस पोलिस कोठडीत ठेवण्यात आले असल्याचा व्हिडिओ व्हायरल झाला.

या प्रकारात आष्टी पोलिस ठाण्याचे सहाय्यक पोलिस निरिक्षक शिवाजी नागवे हे फिर्यादी नागरिकांना मारहाण करीत शिवीगाळ करीत असल्याचा आरोप लावण्यात आला आहे. कायदा पायदळी तुडवणाऱ्या पोलीस अधिकाऱ्यास बडतर्फ करण्यात येवून त्यांच्यावर गुन्हा दाखल करण्यात यावा; अशी मागणी या आंदोलकांतर्फे करण्यात आली आहे. यावेळी सकल धनगर समाज धुळे जिल्ह्याचे अनेक पदाधिकारी व कार्यकर्ते मोठ्या संख्येने उपस्थित होते.